“一”，上一篇讲了一点点。普通话里个一点点到了上海闲话里可以化出交交关关个表达来。上海人讲得最多个是一眼眼。一眼眼，一点儿也。可以用来表示距离。“请老太太再坐过去一眼眼，让搿个小朋友也来轧只位子休息休息。”可以用来表示分量。“搿个几根竹笋只有两斤过一眼眼，就算两斤吧。勒脱点零头，明晨再来买侬个小菜。”可以用来表示数量。“介一眼眼生活，半天功夫帮侬做脱！”可以用来表示程度。“衣裳个颜色还可以深一眼眼，穿上去就弹眼落睛了。”一眼眼是上海闲话当中个大路货，到处可以派上用场。长一眼眼，短一眼眼。重一眼眼，轻一眼眼。亮一眼眼，暗一眼眼。大一眼眼，小一眼眼。快一眼眼，慢一眼眼。贵一眼眼，一眼眼。听勿懂一眼眼个，与上海人交流就一眼眼也勿方便了。

　　一沰沰也是一点点。一沰沰要比一眼眼更加小一点点。“杯子里个一沰沰老酒就吃光吧，门清门清！”比一沰沰更小更少个上海闲话是讲一弥弥。“饼干箱里个蛋卷只剩屑屑粒粒，一弥弥，啥人吃得饱！”“阿二头三岁了，还长得一弥弥小，急煞伊拉外婆了。”一弥弥是从英文当中来个，也可以算是洋泾浜闲话。还有一屑屑。一屑屑，顾名思义，太小太少个粒粒头、脚脚头。“火腿只剩下来一屑屑了，笃到汤里是呒没啥个火腿味道了。要么再去买一块。”讲到吃，还有一口头。“一根油条一口头塞下去，吃相太难看了。”

　　形容很少，上海人还常常用一滴滴。“报告书还剩一滴滴就可以写好了，大功马上告成！”“到大世界还只有一滴滴路要走，打的勿合算了。”“胃口推扳，吃了一滴滴物事就饱了。”形容辰光很短，上海人讲一歇歇。“等我一歇歇，我去拿只背包开路。”“一枱子酒菜阿姨一歇歇就搞停当了，手脚快，本事大！”形容又短又小又矮，上海闲话讲一。”搿条裤子一落水缩得一勿好穿哉。”“伊个男朋友矮来一两个人走出去勿般配个，吹脱算了！”上海人讲到一××，是蛮有讲究个。是以表达妥贴得当来体现一个人个上海闲话功力个。

　　以“一”领路带头个上海闲话真是勿勿少少。“一天世界”、“一塌糊涂”、“一脚落手”、“一拳来一脚去”、“一刮两响”、“一报还一报”、“一钿逼杀英雄汉”、“一把年纪活辣狗身浪”、“一只碗勿响、两只碗叮噹”……要一塌刮子、亨八冷打讲光，只有请专家出场了。