记得阿拉小辰光好像比现在要冷得多，耳朵常会生冻疮，两只手也冻得像红萝卜。

　　姆妈会得想办法，伊用屋里向零零碎碎个绒线，结出阔一尺横里、高五寸横里搿能一块物事，对折起来加厚，再辣拉两头钉好揿钮，揿牢仔揿钮，就变成功一只绒线领圈，套辣拉头颈浪向，邪气适意、交关暖热。

　　阿拉兄弟姊妹多，姆妈一记头要做好几只绒线领圈，分配拨阿拉兄弟姊妹一人一只。男小囝用黑颜色、灰颜色个咾啥；女小囡用杂色绒线结出来个夹花个，更加好看。

　　搿个绒线领圈，搭节约领（就是“假领头”），侪是上海人个发明。辣拉物资匮乏个年代，真个是派大用场。现在年纪辣拉六十岁以上个，相信勿管是男同志还是女同志，肯定侪戴过绒线领圈个。勿晓得侬戴过口伐？