中国人有一句老话，叫做“开门七件事，柴米油盐酱醋茶”，每一个字，全跟“吃”有关系。可见“吃”，勒了老百姓的生活当中占有多少重要的地位。

　　现在生活水平越来越高，物质越来越丰富，想吃啥就吃啥。交关人就动足脑筋，想出交关名堂来吃：结婚要吃、养仔儿子要吃、生日要吃、结婚纪念日也要吃、春节要吃、中秋要吃、考上大学要吃、寻着工作也要吃、造房子要吃、搬场要吃、参军要吃、退休要吃、拷开骷浪头（打破头）也要吃。

　　前两日上海刮台风，阿拉隔壁邻居走了马路浪，一块广告牌被台风吹下来，敲了他的头浪厢，头开花，肇事单位除了秦　负担医药费，还赔了伊二千元。一道白相来　的小兄弟晓得以后，讲伊平白拿进二千来　元，一定要伊请客。结果一顿开销，总共用脱二千五百元。

　　而上海闲话当中的“吃”，特别生动，用的地方邪气丰富，甚至有点令人匪夷所思。简单来讲就是，好吃的要吃，勿好吃的也要吃；能够吃的要吃，勿能够吃的也要吃。比方讲，领导批评侬，叫“吃牌头”；爷娘教训，叫“吃生活”；外头碰着勿称心的事体，叫“吃搁头”；两头受气叫“吃夹档”；碰着勿讲诚信的人被骗叫“吃药”；预先讲好的承诺勿兑现叫“吃空心汤团”，捞好处叫“吃回扣”；捞得过分捉进去，叫“吃官司”。

　　营业员服务态度勿好，叫“吃生米饭”；赖了屋里啃老，叫“吃老米饭”；年轻姑娘出卖色相叫“吃青春饭”，调过来，男青年就叫“吃软饭”；男女之间举止轻浮叫“吃豆腐”，追求人家被回绝叫“吃弹皮弓”。

　　爷娘打小囡，打了头浪叫“吃头塌”，打了屁股叫“吃屁股”，打了面孔浪叫“吃耳光”。

　　迪格还勿算啥，更加结棍的还有。前一腔，上海一对夫妻到土耳其白相，钞票瞎用，好吃的物事勿吃，勿好吃的物事瞎吃，叫啥到地摊浪厢“吃”进两块石头。吃石头扳要“吃夹头”，过海关的辰光“吃家生”了，讲伊“走私文物”，摊板一眼还要“吃官司”。好得现在阿拉国家“吃硬”了，最后拿伊拉保出来，唔没“吃苦头”。

　　更加叫侬“吃勿消”的故事还有来。上个世纪六七十年代，上海流行“调房子”，阿拉有个邻居，用40平方的房子，调人家30平方。我讲侬阿是“吃错药”了。伊理直气壮地搭我讲，啥个“吃错药”，我“吃伊地段”侬懂?

　　我是杨树浦，调伊淮海路，伊格个地段几化“吃价”，我吃的是伊的地段。过了唔没几化日脚，伊又拿淮海路30平方的房子，调人家20平方的房子。我问伊，上趟大调小，侬“吃”人家地段；格趟侬吃人家啥物事？伊洋洋得意地搭我讲，“吃人家卫生设备。伊拉屋里一只抽水马桶赞格，我就吃伊格只抽水马桶，我吃煞塌了！”