讲到重阳节，起头要讲一讲重阳节个来历。“重阳”迭个词是依据《易经》里“以阳爻为九”推出来个。九月初九，两个九碰垃一道，便叫仔重九。《易经》里九为阳，两个阳合垃一道便称重阳。重阳习俗早垃秦、汉辰光，就已经形成，到仔唐代，才被正式个定名叫重阳节。

　　古人讲九是个不祥数字，九后头就是零，由盛转衰；九九归一，便要从头来过，告咾九会拨灾难带垃人类。晓得迭个讲法后，但凡逢九月九，大家侪从屋里走出去，迓到高处（山上头）避灾，还要勒垃身上头佩插茱萸驱赶魔鬼。葛末就产生仔交关个习俗：登高、佩插茱萸、赏菊、饮菊花酒……据史书上讲：汉代辰光京城长安（现在个西安市）东南面，有一处名叫“乐游苑”个高地，是京城里向最高个地方，逢到重阳大家侪登迭个高地，辰光长了人们就侪称“登高”。后人不管是登山、登岗、还是登楼、阁、登塔，依照前人个叫法侪讲“登高”。

　　上海呒没高山(地），重阳节大家侪只好登楼阁、逛庙宇，象征性个登高。《松南乐府》里向写：“黄菊告重阳，北郭军台登振武，西郊佛阁蹑沉香，东更上临江。”振武，就是老早个振武台，旧城北门个敌楼，后来又改名叫玄武楼。沉香，就是沉香阁，老早仔西郊个佛阁。临江，就是老早东门个临江阁，后来个名字叫大悲楼；城东还有一座丹凤楼，楼上有奎宿阁，高三层。立垃阁上观看城里、城外个风景邪气好。老早个辰光，城里向人侪欢喜登迭个。还有大境阁、豫园个大假山，侪是重阳登高个好地方。

　　重阳节除仔登高，还有吃重阳糕个习俗。上海地方做个重阳糕，是垃粳米粉里向掺仔一眼眼糯米粉，做成小块个放垃灶头浪向蒸熟。颜色黄黄个，叫卖辰光糕上还插垃一面小个三角旗。清代李行南写个竹枝词讲：“餐饵谈家名最优，题糕醉菊酒新茑，携朋共有龙山兴，海邑龙山是凤楼。”餐饵就是糕点，搿搭就是指个重阳糕，以谈家做个名气乓乓响。不过，后来个嘉定、川沙高桥个松糕，也交关个有名气。老早个辰光，也有人家拨重阳糕切成小片，贴垃儿女们个额头上向，祝福儿女们百事顺利，日日俱高。

　　赏菊也是重阳节个重要习俗。上海老早仔是垃豫园萃秀堂个外头，重阳节常常举办菊花会。所有个名贵菊花侪集中垃一起，摆开来拨参观个游人观赏。还要按“新巧、高贵、珍异”三条标准，评选出花魁。清代个王韬垃《瀛埔杂志》里向，描述了当时个情景：“瘦石疏台，曲廊小榭，已觉萧然有秋意，绕湖石折而东北，境地开朗，遥见菊影婆娑，毕呈眼底；循回栏而入，则万卉齐花，高低疏密罗列堂前，棐几湘帘，瓷盆竹格，无不尽态极妍，争奇斗胜。”秦荣光个竹枝词里向也写：“菊花上海最名闻，粗细园中两种分，一种独推城里有，潘家白品贵超群。”花大如碗口则称粗品，各色剪绒、西施、狼牙个侪称细品。花瓣成簇球状则称潘家白。