阿拉屋里向有一台“三五”牌台钟，因为来历特别，我邪气珍惜。

　　上世纪七十年代初，我准备结婚，迭个辰光，大到家具，小到自来火，侪要计划供应，但靠亲戚朋友帮忙，结婚个用品也勉强备齐，只有女方爷娘提出个“三五”牌台钟一直呒没着落。

　　“三五”牌台钟因为走时准，还会报时，当时吃香得勿得了。迭种台钟搭仔当时个缝纫机、脚踏车、电视机等一样要凭票供应，但又勿像其它日用品或副食品每个月有计划。搿类票证侪是按行业系统分配到厂里，啥辰光有，分配点啥个票子侪勿敲定。再讲一爿厂几百号人，一塌刮子就几张票，为求太平，厂里侪是轮流分配到车间，由车间再分到小组，组里大多也是采取摸彩个办法解决。“三五”牌台钟是当时所有系统分配个票证品种中价钿最便宜个，告咾特别紧张。自我进厂，阿拉组里就呒没分到过台钟票，即使分到，摸彩也勿一定摸到。再讲我复员回到上海勿长，朋友勿多，厂里人头勿熟，也勿好意思对人家开口。更加要命个是，“钟”与“终”读音相同，钟是勿作兴让人送个，结婚就更加勿可以，否则就变成“送终”。为了迭台钟，我多次告女方爷娘协商，但伊拉就是勿松口，真担心迭桩婚事会因钟而终。我一道做生活个陈师傅晓得以后，一次次帮我寻分配票证个工会干部，但侪打了回票。

　　正当走投无路个辰光，有一天上中班快下班辰光，陈师傅突然将一张纸塞到我手里，悄悄点对我讲：“台钟票，快点去买来把婚事办了，千万勿要过期。”迭个辰光，我开心得勿晓得讲点啥，但又觉得邪气奇怪，介紧张个台钟票，伊是从啥地方弄来，又是哪能弄到个呢？

　　陈师傅告诉我，搿张台钟票，是伊老里八早带过、后来调到其他厂当生产组长个徒弟弄来个。原来，自从伊晓得我因为缺张台钟票结勿了婚，厂里又勿能解决，就垃拉外头到处托人。前几天，伊当组长个徒弟小组里分到一张台钟票，为了弄到手，就串通自家要好个小兄弟，随后当仔大家个面折叠摸彩纸条个辰光，偷偷个垃拉画有“台钟票”记号个纸条里包进一粒黄豆大个小石子，当折好个纸条撒到桌面，事先“有数”个小兄弟抢先用手掌心一揿，一记头就摸到了台钟票。

　　等我买好台钟呒没几天，陈师傅对我讲伊拉徒弟组织摸彩个“西洋镜”，勿晓得哪能穿绷了。我吓仔一跳，勿晓得哪能办。陈师傅随即笑笑讲：“还算好，大家非但勿闹，还倒过头来安慰组长讲，早晓得迭能，就勿要出花头摸彩哉，只要讲一声，阿拉勿会勿同意个。”我一听，又是感动，又激动。

　　一晃四十多年过去了，虽然多次搬场，结婚辰光个物事大多已呒没踪影，但迭台“三五”牌台钟非但舍勿得淘汰，还有意摆垃随时随地看得见个梳妆台浪，我对搿台钟个感情是随便啥名牌钟表都勿能替代个。