过年个辰光，看到走亲眷个侪拎仔各式各样漂亮挺括个纸板盒，勿由得想起老底仔个网篮头搭三角包。

　　先讲讲三角包，一张方纸头，大小各异。店家将顾客买个食品，包成一只四面体个三角形，有一头微微尖出，与三角粽相似。现在五十上下个人侪相当熟悉，勿管是勒熟食店称二两猪头肉、弄几块兰花豆腐干，还是勒拉小摊头上买点油汆花生、赤沙豆，烟纸店里要两只角子白砂糖、五分盐精栆，或者到南货店里抓一把开洋、称点金针菜，勿管老少伙计侪能相当利索个拿侬要个东西包成一只“三角包”，就算侬勿小心落到地上，也包侬散勿脱。

　　另外有种方形个纸荷包。现在常勒影视剧里看到，好像只有中药店包中药。其实用得最多个是南货店，一张尺余见方厚厚个草皮纸，将桂圆、香菇、红枣、蜜枣之类包成一个鼓鼓个方枕，再复上张印有该店店招个大红纸，用麦秆一扎，还勿忘系只拎手。既方便、喜庆又原生态。只有勒拉买饼干、糕点、糖果时，才用现成个纸袋，通常是用薄牛皮纸做个，考究点还印有店招。

　　现在，勿管是地摊，还是场面老大个菜场，一把鸡毛菜还是两条河鲫鱼，也勿管是食品公司还是大卖场，无论买啥，一律塑料马夹袋！尽管有“限塑令”，白色污染仍勿见减少。只勿过是让老百姓多掏了几只角子。

　　再讲讲“网篮头”。网篮头用得最多个是水果店，哪怕是节日里个临时摊头，边上准有一摞网篮头。伊个辰光水果种类少，除脱苹果、橘子、生梨，应时个有香蕉、柿子、石榴，枇杷、葡萄就勿多见了。除了文旦、西瓜，只要能装得进，总归是网篮头。

　　网篮头，一种将密竹心批得席薄，劈成两分宽长条，稀朗朗编成只上大下小个篮头，还有只带点弧形个盖。装得再满也不过十来只橘子，或七八只苹果。称过分量，一张喜庆个红纸复勒上头，合上盖，用稻草绳一扎，同样绕只拎攀，就可走亲访友哉。关系好点，或者长辈之类就来上两只。说勿上“君子之交淡如水”，但伊个辰光，人与人之间，较少以钱物讨好，“行贿”就更少了。老底仔就一个礼节，一份心意。尤其勒拉春节期间，马路上侪是拎之网篮头，穿身新衣服满脸喜气走亲访友拜年个人。

　　网篮头淡出大家个视线，大约勒上世纪八十年代初，八十年代后期直至九十年代，时兴起奶油蛋糕，逢年过节可以称得上满街尽是蛋糕盒呢！一下子，上海人好像侪戆脱了，勿晓得除了奶油蛋糕还有别个物事可称之为礼物。有时见一家三口走亲戚，居然拎了两尊蛋糕。蛋糕盒子也越做越大，纸板个、塑料个，最后干脆是厚厚个白色泡沫塑盒，既轻又大，卖相挺括。家父因辈份大，加之学生多，春节时家里真像是开了家蛋糕店，我家人算得多了，就是一日三顿勿吃饭，也承受勿了，只得忙着往左右邻居家送，还得一个劲感谢帮忙……