小辰光，竹篮头可以讲是每家每户个必备品，最常见个是一种水桶形个“杭州篮”，辣阿拉小囡心里，伊是“权”和“责”个象征，提篮者掌控一家温饱大事；更是“吃”个代表，里向有鱼肉蔬果，搿种竹篮头有一个专用名词——“菜篮子”。改革开放以后，市政府为了提高大家个生活质量，专门搞过一个“菜篮子工程”，让大家餐桌浪向个菜品丰富起来。

　　竹篮头本来只是一种容器，但是有辰光也可以摇身一变充当主人个替身。记得当年菜场人多菜少，到处要排队，有人灵机一动，用篮头代替自家排队，俗称“摆篮头”，搿也是我童年记忆里印象比较深刻个事体之一。埃息辰光，阿拉搿栋楼里个小囡自发组织起来，每人拎三四只破篮头，一道去菜场排队“摆篮头”，等开市了，家长来买菜就可以少排交关辰光队。就像白居易《放鱼》诗里写嗰:“晓日提竹篮,家童买春蔬。”篮头排队，阿拉游戏，买菜白相两勿耽误，竹篮头功不可没。

　　辣海相当长个一段辰光里，阿拉上海人个居住条件相当困难，一栋勿大个石库门房子里住七八家人家司空见惯，几家人家合用一个灶披间，大家侪是见缝插针，螺蛳壳里做道场。为了让每家人家有自家个电灯，天花板浪个电线拉得像蜘蛛网。因为呒没电冰箱，为了存放吃勿脱个食物，每家每户侪会挂几只竹篮头。买回来个蔬菜汏干净放辣竹篮里，挂辣水斗上头控水。吃勿光个剩菜剩饭放辣竹篮头里，盖一块毛巾防灰尘，挂到通风口，可以暂时避免食物变质。记得当年每到端午节，家家户户包粽子，自家屋里包个粽子加上邻居分享个粽子，一时吃勿光，往往装到竹篮里，挂辣灶披间，结果整栋楼里侪有一股淡淡个粽子清香，搿也是阿拉小囡最欢喜闻个味道。可以讲搿点不同形状不同颜色个竹篮头是当时生活当中个一道风景。

　　小辰光，阿婆有一只“香篮”，椭圆形，分上下两层，有篮盖，拎攀浪向有竹雕图案，篮身浪向还有两块对称个花饰铜皮。整只篮头看起来油光水滑，据说表面“罩”过一层清漆，可以起到保护作用，勿容易生霉腐朽。阿婆邪气宝贝搿只篮头，平常用一只蓝颜色个布袋套起来，放辣大橱顶上，就怕被阿拉搿点小囡碰坏脱，只有到了过年前才小心翼翼拿出来，用干布擦干净以后装瓜果零食招待客人。香篮造型独特，做工精良，放辣里向个点心好像也因为香篮个精美而提升了一个档次。等客人一走，香篮又被大人藏得不见踪影。在阿拉搿点小朋友眼里，放满各种好吃零食个香篮就是“百宝箱”，寻篮头“偷”零食是阿拉个“新年游戏”。

　　七八岁个辰光，我跟着阿婆回了一趟老家。老家有一个比我大两岁个表舅，伊拉屋里小囡多，生活压力大，表舅过了十岁就被送去学竹编手艺，当篾匠。学徒要从最基础做起，每天天蒙蒙亮就起床劈篾，拿一整根竹头劈开，用不同部位制作不同性能个篾片或篾丝，再做成竹制品。除脱我晓得个竹篮头，还有竹筛、竹簟、竹席、竹筷、竹笠、竹扫帚、竹背篓、竹蒸笼、竹笊篱、竹畚箕等生活用品，更有竹床、竹凳、竹椅、竹厨等家具，甚至还有价值较高个民间工艺品竹雕。据说当地做得好个竹制品是专门用来出口嗰。表舅因为人小，掌控不好篾刀，一双手经常血迹斑斑，有篾刀划伤嗰，也有被竹子拉破嗰，精美竹制品背后是艰辛个付出。

　　我回上海前，表舅精心劈了篾，请师傅编了竹编包和元宝篮给我当礼物。竹编包辣当年是稀罕物，市场浪向基本看勿到，交关小朋友看到以后侪老眼热了。我每次用搿只竹编包侪会想到表舅手浪向个伤痕，对伊邪气爱惜。

　　到了现在，各种竹篮头侪已经是明日黄花，“挂篮头”变成股票市场里向预设高价卖出或预设低价买进个术语，好像同当年个本意呒没多少关联了。至于竹篮头装物事个功能，侪被各种大大小小个塑料马甲袋取代了。勿过塑料马甲袋个泛滥既带来了便利，也增加了环境污染，我还是念念不忘当年个竹篮头。