小辰光，浦东基本浪向侪是一派田园风光。到处侪是绿油油个农田，里向还有纵横交错个沟渠和小河浜。有一天，我搭仔几个胆子大个小玩伴互相约好去摸螺蛳。

　　拿好准备盛放螺蛳个一只小篮头，笃悠悠走到屋里向附近个小河浜边。搿条河浜水勿深，只有齐膝深，我卷起裤脚管，赤脚走进水里向，用双手辣水底里来来回回慢慢摸。摸了一段辰光，数了数篮头里个螺蛳，勿满廿只，勿够装满一盆菜，心里向难免有眼失望，总想辣菜场里向邪气多个大大小小螺蛳，勿晓得伊拉究竟是用啥办法弄来嗰。后来又去了附近其他几条河浜，虽然收获有多有少，但是相差勿多。慢慢交，我有了一点想法，或许是因为小河浜个水面比较宽，螺蛳活动范围就比较大，相对密度就小，摸起来也就比较困难。想到搿搭，我就搭其他小朋友商量，到农田个沟渠里摸摸看，大家一致同意。

　　说去就去，阿拉几个人一道“转移阵地”。一歇歇，一条小水沟出现了眼门前，里向水勿多草勿少，我心里有点怀疑，搿搭会有螺蛳口伐？勿管哪能，来了就摸摸看。呒没想到，稍微摸了两把，就捞上来十几只。我搭仔几个小伙伴侪兴奋起来，马上每人寻一段水沟，分头行动。等回去个辰光，大家个篮头里基本浪侪装满了，我个篮头里还有几只顺便捉到个蟛蜞。

　　回到屋里向，爷娘看到我手里装满螺蛳个篮头大惊失色，拿我狠狠交训了一顿，禁止我再到河浜边浪去白相。好在训归训，总算呒没吃生活。最后，搿点摸到个螺蛳侪成了老爸个下酒菜，我也沾光尝到了自家个“劳动果实”。

　　一晃几十年过去了，我还经常会记起搿桩事体，并为当时勿懂事体而自责。