小区里告【和】老娘舅打招呼个人蛮多，主要是老娘舅热心：“侬好啊！”“转来啦？”“前头有只车位，快点去！”搬到小区六七个年头了，电梯里向、门厅里外、楼道当中、小区路浪、小花园里，告老娘舅打招呼个人一年比一年多起来。

　　老娘舅觉着蛮开心，邻里蛮和气、蛮热络。不过客气归客气，现在打招呼告老早弄堂里个打招呼勿一样哉。点头，不过勿晓得来头；问好，但是事体少问为好。叫做“只管招呼，勿带称呼”。再也听勿到“王阿姨”、“李家婆婆”、“金医生”、“赵师傅”、“小范、小沈”搿能介【这样】既客气又可以晓得对方姓啥、工作做啥、辈分是啥个称呼了。

　　啥道理呢？老娘舅想，主要是小区个格局变了。弄堂里向走道狭小、房子矮小、庭心咾小，左邻右舍轧辣一道过日脚，几十年下来，隔壁个雪菜炒肉丝味道闻得着，楼下头小弟弟个读书声听得着，张家长、李家短，大家侪煞辣势清【十分清楚】，告咾【所以】互相之间个称呼也是老有分寸、老老足准个。现在个小区呢，住户侪是各地来个，侪是勿认得个。各家人家大门关牢，勿来勿去。老早做啥，根本勿晓得；现在做啥，一眼也勿清爽。葛末就勿好瞎叫，只好点头笑笑，讲声“侬好”！还有末，就是现在生活节奏加快，大家来去匆匆，平常侪是垃出出进进辰光碰着，连退休老人也邪气特别个忙，呒没辰光多茄山河，葛末就只好简简单单打打招呼。三末是现在进入了邻里之间互相尊重个升级版，侪勿约而同形成了勿成文个规矩，勿要主动探听人家屋里向个事体，因为家家人家侪有得“个人信息保护”意识，包括啥地方人、垃做啥工作、几化（多少）岁数、爷娘小囡、男人老婆咾啥本来仔常庄要问个闲话作为“闷包”打垃自己屋里向，勿会得随随便便“批发”出去。葛末侬就勿好冲头冲脑【冒冒失失】叫人家“阿姐”、“小妹”。拿人家岁数叫大了，会得勿开心，叫小了又像啥老茄茄。结果只好一直用“侬好”来招呼邻居。

　　尽管呒没办法用称呼来打招呼了，碰着自己小区个人，老娘舅仍旧欢喜打招呼。