语言是呒没贵贱之分个，就像任何地方的人侪是平等个。中国个各种方言侪勿是低档语言，方言里向有得交关有趣个动词、形容词是普通话里向呒没个，普通话个生动性远远及勿上任何一种方言！方言里向还有交关文化个传承，小人勿讲方言了，葛末，伊个文化个根就没了！国家推广普通话，假使带来个是搿能个副作用，葛搿个代价也实在是忒大了！

　　现在辣上海，勿管是年轻个家长，还是长一辈个老爹、唔奶【nna】，外公、外婆，搭小囡才辣用普通话讲闲话，讲得再洋泾浜、再怪也用。葛末问伊拉为啥搿能样子？所有个人侪讲：呒没办法呀，伊拉勿肯讲，讲勿来了呀！只好搭伊拉讲普通话。

　　我认为，小人勿肯讲，家长要负老大个责任。侬想，小人因为蹲辣学堂里向辰光长，普通话讲得多；上海闲话讲得少，老有可能伊拉讲个上海闲话里向有眼音会得发错脱，用词勿大对。家长呢，只要一听到小囡讲得勿对，马上就去嘲笑伊，讲伊讲得介难听个，像外地人讲个一样。让小囡觉着老没面子个，辰光一长，伊拉就只讲普通话了。

　　建议大家：自家小囡个上海闲话讲得再勿好，开始辰光一定要多表扬，少批评；慢慢叫再讲拨伊听，假使调一种讲法，或者搿能介发音就更加好了。万一小囡只肯讲普通话，家长要坚持只用上海闲话，勿搭伊讲一句普通话。还有，只要是伊搭侬提要求，葛末侬就假装听勿懂，叫伊用上海闲话来讲，或者要伊模仿侬讲一遍后，再去满足伊个要求。只要坚持一段辰光，小囡就会得有信心，也会得愿意开口讲上海闲话了。大家可以去试试看，一定来三个！

　　文/丁迪蒙(上海大学语言学副教授)