老同学小张，从小到大做随便啥个事体，伊侪讲“勿搭界”。记得垃拉读小学个辰光，有一趟，伊勿小心拿裤子前门襟穿垃后屁股了。同学侪笑伊，叫伊快点换过来，伊讲“勿搭界”。上班后，单位里个同事，侪晓得伊从来勿办银行卡，现钞全部放垃屋里向。同事们提醒伊，伊讲“勿搭界”，随用随方便。有一趟单位里向交关同事联合起来惹伊：“小张，上个礼拜六，侬垃单位里向加班，阿拉看到 老婆搭仔一个男人垃拉荡马路”。乃末旁边人一道撬边：“对个、对个，阿拉侪看到个”。小张无动于衷讲：“迭个勿搭界”。“阿拉还看到迭个男人跟老 老婆一道到屋里向去了。”小张：“迭个勿搭……啊！。 讲啥？”小张一记头反应过来，涨红面孔暴跳起来：“迭个搭界个！迭个搭界个！讲拨我听，迭个男人是啥人？”大家笑嘻嘻个讲：“是?儿子！”小张听了一下子又慢声慢气讲：“迭个勿搭界。” 

　　有天夜里十一点敲过，天浪又是刮风又是落雨，小张踏了个脚踏车，去接中班下班个老婆。两家头开始朝屋里向踏。进了小区，看到屋里楼下停了一部小型货色车，几个黑影子鬼鬼祟祟垃拉朝车子里向搬物事。小张老婆一下子就感觉着是贼骨头：“老公，有贼骨头。阿拉快点报警！”小张慢吞吞讲：“迭个勿搭界”。小张老婆问：“为啥勿搭界？”小张轻声讲：“又勿是偷阿拉屋里，多管闲事。”垃拉小张“勿搭界”个影响下，小张老婆最终选择了沉默。半个钟头后贼骨头跑脱了，两家头再上楼。一进屋里门，只看到屋里向一片狼藉，现钞搭仔交关值铜钿个物事侪呒没了。“啊？原来刚刚几个贼骨头……”小张一下子瘫了下来。夫妻俩省吃俭用半辈子个积蓄全部呒没了，迭个教训使小张彻底醒悟，下趟小张再也勿讲“勿搭界”了。现在小张还加入了居委会组织个“在职职工业余治安巡逻队”，每天夜里为小区居民巡逻放哨，双休日还经常向小区居民讲解防盗知识。上个礼拜天，我也去听了伊个讲课，课后我问了伊几个问题。我问：“为啥老式里弄个房门要换防盗门？迭个勿搭界个 ？”小张讲：“搭界个！贼骨头入室盗窃最常用个手法就是‘插片’，新个防盗门可以防止‘插片’。”我问：“为啥阳台搭仔卫生间个门窗一定要锁牢？”小张讲：“空调架、水落管一般侪装拉阳台塔仔卫生间旁边，贼骨头会得利用进行高空攀爬盗窃。”我问：“为啥楼道感应灯坏了一定要及时修好？”小张讲：“贼骨头顶怕就是灯光。如果楼道灯光能透进侬个屋里，说明侬个防盗门处垃虚掩状态。”我又问：“为啥发现楼下个电控防盗门，拨拉砖头等异物夹垫，一定要拿夹垫个物事及时拿脱？”小张又讲：“电控防盗门是整栋楼个第一道防线，个别居民为图方便，用砖头等异物夹垫，让伊门无法关闭，迭个实际浪向为贼骨头开启了方便之门。”我为伊从“勿搭界”到“搭界”个转变而感到高兴。 

　　小张搭我讲：“年夜头快到了，贼骨头想趁机捞一票回去，阿拉一定要增强防范意识，做好防范措施啊。迭个跟每家每户侪‘搭界’个！”。