同福里是虹口区一条连接两条马路个大弄堂。我上小学个辰光每天侪要从周家嘴路大门进去，从小门穿出来，再走差不多五六分钟就到了学堂。迭条弄堂有好几只小门，我勿欢喜盯牢一只，总归今朝从公平路出来，明朝从东余杭路出来……每只弄堂口侪有勿同个花样。穿弄堂赛过像看万花筒一样，市井气息应有尽有，从来勿曾有过冷落个感觉。大弄堂口天天是人轧人，为啥呢？因为靠里向一眼是老虎灶，从早到夜热气腾腾，热水瓶、铜吊（水壶）排起队来等热水。热水瓶是一分洋钿一瓶，大一点个铜吊是两份洋钿一吊。靠外面一眼是大饼摊，光大饼三分一只，酥油饼五分一只，油条四分一根，还有淡豆浆三分一碗，甜豆浆四分一碗，咸豆浆五分一碗。咸豆浆里有油条、紫菜、虾皮、榨菜末搭仔葱花，还有辣油，看上去色味就好得勿得了。为了一碗咸豆浆，我常常拿买铅笔、簿子个钞票、乘公交车个钞票一分一分省下来。小弄堂口摆过一阵小人书（连环画）摊，大概有一百多种书，基本浪是历史题材。摆摊头个人摆几只小矮凳，靠拉墙头放，坐下来看一本书要付一分钱。我蛮识相个，放学回来作业勿多才会去看一本书。伊个书我差勿多侪看过了，受一套西汉故事影响，一直到进了大学，我还是同情项羽，痛恨刘邦。还有电影小人书，是拿银幕形象剪辑下来，再配简单个文字。有不少生字，我先是从电影小人书里猜出来，最后就记牢了。记勿得是70年代末还是80年代初，老虎灶呒没了，阿拉屋里买了一只火油炉，凭票买火油，可以烧烧面条烧点水。不过烧水邪气勿合算，比勿上到老虎灶泡水。大饼摊倒是一直摆到我离开迭块老土地，伊啥辰光也呒没了，我勿晓得。不过，人到中年以后，我无数次想自家动手做出同福里弄堂口迭种口味个咸豆浆，侪做勿出来。我现在用单位奖励先进发个一只豆浆机做豆浆，阿拉一家门侪吃豆浆勿吃牛奶了，钞票也好省脱勿少。