媒体报道，经过有关部门搭仔科研机构个联合攻关，松江个青背、白脐、金爪、黄毛个黄浦江大闸蟹，又“重出江湖”。听到迭个好消息，我回想起自家几十年前吃黄浦江大闸蟹个有趣事体。

　　垃读小学个辰光，礼拜六下半天学放得早，我就会到南码头去白相。因为埃搭块有一家老大个木材加工厂，车间背后个黄浦江边一直漂着交关木排，沿牢木排可以跑到老外头，欣赏水里向游个鱼。有一趟，我迎着秋风踏上木排，看到熟悉个刘老伯立垃前头，伊是我个邻舍，主要靠用“扳罾”垃黄浦江捉鱼捉蟹维持生活。“扳罾”迭种古老渔具邪气简单：靠扎成“十”字状个两根竹片撑开尼龙网个四只角，当中用线荡一眼诱饵，再连牢一根用来操纵个长竹头。刘老伯捏着长竹头，眼睛瞄着水里向，每隔一歇就拿尼龙网拉上来，收脱里向个物事。

　　我跑到刘老伯身边一看:“喔喲，刘伯伯已经捉牢勿少大闸蟹了嘛！”刘伯伯回答：“搿呒啥稀奇。我年轻辰光经常去松江，埃搭块捉来个黄浦江大闸蟹特别好吃，因为上游个水质更加好。”刘老伯晓得我有兴趣，就拿长竹头递过来:“尼龙网里向有物事了，侬来试一试!”我搓了搓手，立稳双脚，捏紧长竹头拼命一拉，尼龙网露出水面，有两只黄浦江大闸蟹垃里向爬，像煞要对自家落网提出“强烈抗议”。我开心得穷拍手。接下来，我搭仔刘老伯轮流操纵“扳罾”，到黄昏已经捉牢廿多只黄浦江大闸蟹，还有鱼搭仔虾咾啥。

　　刘老伯拖我到伊屋里去做客。刘婆婆马上拿蟹汏清爽，放到锅子里向煠。等蟹煠得红彤彤，刘婆婆拣出几只顶大个叫我吃。我剥开一只蟹盖，里向蟹黄交关。刘老伯平常欢喜读地方掌故，就咪着绍兴酒介绍起老早上海人个一种“发明”：“清朝秦荣光个《上海县竹枝词》注释里向提着，‘螯内有片壳，白而透明，雄者较大。两片相合，粘贴墙上，俗呼蟹蝴蝶’。”刘老伯还用一只蟹来做示范：掰开两只大螯剔光肉，拿出一对白色透明个片壳，伊拉是对称个，摆垃桌面浪蛮像一只漂亮个蝴蝶。我开心煞了，拿搿只“蟹蝴蝶”夹到课本里向。隔歇，我个阿奶寻得来了，刘婆婆硬劲请伊坐下来一道品尝黄浦江大闸蟹，于是客堂间里向勿断传出笑声……