生了病，去医院看病。北方人讲生病。上海闲话讲生毛病。北方人讲看病，上海人更多个是讲看医生：“一直头疼头昏，要去看医生了。”“看侬个面色勿大好，去看过医生  ？”拿看病讲成看医生，足见上海人是把医生当成亲眷朋友个。好个医生勿但为侬看毛病、为侬开药方、关照侬吃药个辰光、吃药个程序，还会和气悦色个安抚侬一番，让侬放心。因此上海人看毛病欢喜到熟个医院里去熟个医生。医生拿病人当朋友，病人拿医生当亲人。用现在个讲法即是和谐个医患关系。

　　搭医生太热络了也勿好。我40岁个辰光，经老朋友介绍认得一个牙医生，请伊为我治我个一颗蛀牙。我从小最最怕个就是牙医生。一坐到牙医生前头个可起可伏个椅子上，就感觉自家坐上了老虎凳。牙医生个一套看牙齿个五金家生也吓煞人。尤其是用一部电钻头来磨钻侬个蛀牙，叽叽咕咕，叫我神经崩溃。搿位认得个牙医生特别道地，想尽办法要医好保牢我个搿颗蛀牙。钻了又钻，神经烂了又烂。补了又补，磨了又磨。有好几年我变成了牙防所个熟客。老虎凳坐了又坐，电刑上了又上。反正我的搿颗大牙几乎变成了文物，牙医生变成了古董修复师。但牙痛个毛病就一直勿好，蛮稀奇个。我提出拔脱，医生就回头我：“保得牢个，要耐性、要坚持。相信我……”最后我牙齿一咬，冲进一家一点勿认得个牙防所，爬上老虎凳，嘴巴一张：“右边下面最后一只大牙，拔脱！”勿认得个医生瞎爽气，打了麻药，一钳子就拔出了我个文物蛀牙。我把搿颗牙齿托在掌心仔细端看，伊已经被修磨得像一只空个小罐头了。阿弥陀佛，我总算解脱哉。从此我再也呒没牙痛过。勿好意思，我有点骄傲了。当然，我就此再也呒没去看过伊位认得个手艺一级个牙医生了。谢谢伊。

　　除了看牙齿，我几乎呒没看医生个任何经验与心得。难得重感冒一次，我到单位个医务室里去配点药，与医生攀谈攀谈。兴致高个辰光，茄茄山胡。医生是热心人。关心别人是伊拉个职业病。所以我弄勿懂为啥会发生病人、病人家属要打医生、护士个事件。勿是所有个毛病医生都能够看得好个。医院也勿是起死回生个地方。有新闻讲，有医院今后要训练医务人员会一点防身之道；我看搿也是防范过当。如此，医院要变成少林寺。门诊间里要耍拳术，急诊间里要弄棍棒，太平间里要勿太平。病人要尊重医生。医生要体谅病人。搿个才是医患之间个正道。有本事个勿是去打医生，有本事个是练好、养好身体——勿去看医生！