记忆当中读小学个辰光基本浪每年个春游侪是到西郊公园（现在个上海动物园）去。尽管是一趟趟炒冷饭，来来去去个顺序差勿多，同学们还是老扎劲，天天盼日日想：迭个日脚快眼到！望搿天勿要落雨、望自家勿要生病。假使真个发寒热了，也要想办法勿拨大人告老师晓得。

　　活狲是同学们顶顶欢喜看个。进仔公园，大家直奔猴山。侬拿香瓜子、西瓜子惯拨大猴子、伊抛面包或者馒头捏成个小丸子拨小猴子，还有鱼皮花生、水果糖、饼干……搿些平常日脚省下来个零食，侪派上用场了。猴子辣辣山浪山下来回个蹦，一窝轰个抢，上窜下跳个滑稽相引得大家开心得勿得了。孔雀馆是女同学欢喜去个地方，看孔雀开屏要用漂亮鲜艳个颜色去逗伊拉。交关同学拿红领巾解下来挥，一边朝孔雀叫：“开呀！开呀！”孔雀慢吞吞个踱来踱去，就是勿睬，弄弄么头还别过去、身体也别过去，尾巴浪长长个一蓬毛对牢侬，拖来拖去扫地皮。有几个女同学挖出衣裳袋袋里红红绿绿个花绢头再加上红领巾，等孔雀转过来快眼朝伊用力个甩【hue】，孔雀朝大家看看，再走两步，漂亮个羽毛总算竖起来晃法晃法一眼一眼开开来了，大家个手也酸煞了。好白相个是如果阿里个同学长得黑黑胖胖，搿是随便哪能也勿去看河马个，二只手抱牢仔树干，掰也掰勿开。

　　春游吃中饭也蛮闹猛个。侬拨我吃只肉馒头，我拨侬吃半只面包，苹果拿出来一人一半，甜个咸个大家一道分分搭搭味道。少数同学有正宗个军用水壶，搿正是显宝、扎台型个好辰光。搭伊关系好个可以借光咪一二口水，勿哪能个只好偷偷叫瞄瞄，想象自家啥辰光也弄到一只：哼！有啥希奇！有眼同学屋里向有铜钿，直接拿了钞票到公园餐厅排队买盖浇饭吃，老卖样个。

　　出去春游一般是班主任带队，副课老师勿一定去。有辰光音乐老师一道去了，就会得出花头，中饭以后伊肩胛浪背个手风琴，手里向拿铜锣“嘡、嘡”个敲，叫大家坐辣草坪浪击鼓传花或者各个班唱只歌咾啥，同学们大多数是魂灵头勿辣海，东张张西望望，一歇歇小便、一歇歇嘴巴干，只想快眼结束，好去看还呒没看个动物。乃末班主任好笑、其他老师也好笑，弄弄半吊子就收场了，“———”大家跳起来就往看好个目标跑！

　　一日天疯下来，各个班级要集中排队乘车子回去了，老师个叫鞭吹了交关辰光，只有稀稀拉拉个走来几个同学，乃末老师用电喇叭朝东朝西哇拉哇拉穷叫，弄得勿好还要到公园广播站叫某某班个某某同学快到出口处集中。到了车子浪，大家还唧唧喳喳个讲勿停：啥人出了啥洋相；啥人要紧喂猴子点心厾脱交关，自家肚皮呒没吃饱老是讨东西吃；啥人小家败气好物事囥法囥法一个人偷吃；啥人赶了看大象表演穷奔！路浪掼脱一跤！裤子掼了一只洞，伊拉姆妈要骂了……还有几个同学一边望野眼一边分吃呒没吃光个零食。要是有身体勿大好个同学，车子开一路伊吐一路，老师急得来一路浪左看右看寻公用电话，好通知家长来接接伊。

　　学堂快到了，就听到老师搭老师辣拉讲：喔——唷！我个心总算落下来了。