我刚刚读初中个辰光，收音机侪是有钞票人家白相个，靠工钿吃饭个老百姓买勿起，也用勿起，想听电台个广播，就隑到弄堂口有收音机个烟纸店门口去听。不过店老板也蛮小气，看我光听“白戏”勿买物事，就会拿收音机关脱，想想蛮呴个。

　　为了收听电台个广播，有点人就买零件自家装矿石收音机。搿种收音机比起当时个电子管收音机要简单得多，而且收听节目覅用电，勿足个地方就是声音太轻，只好一家头听，外加要用劲捂牢耳机才能勉强听清爽。当时垃拉居民比较集中个地区，凡屋顶高头有根缚电线个竹头，板数就是矿石收音机个天线。搿种收音机对于像我一样好奇心比较强个初中生来讲，也老想装一只，但是爷娘负担重，能够供我吃饭读书已经算勿错了，哪能再好伸手讨钞票呢？

　　正当我一筹莫展个辰光，想勿到机会从天而降。

　　我原来垃拉中山北路靠近武宁路一所离开屋里勿远个初级中学读书，正当要升初三，屋里搬到龙华路靠近鲁班路去了。爷娘本来当仔好转学，勿晓得学堂里讲毕业班勿好转，还讲是上头个规定。乃末死蟹一只，只好每天乘车子穿过整个市区去读书。

　　当时有部从半淞园路江边码头到曹家渡个公交车（注：45路）经过阿拉弄堂口，读书一趟单程就是一角五分，我就乘搿部车子来来去去。因为埃辰光从曹家渡到学堂呒没直达公交车，搿段路只好两只脚走。爷娘本来要为我买公交月票，但我坚决勿同意，讲出个理由也乓乓响：现钞买票同买月票推扳呒没多少，万一月票落脱，反而勿合算，再讲每天买车票要比一记头拿出六块铜钿买月票省力。爷娘听听蛮有道理，就同意了。其实我又勿是戆大，勿晓得买月票既合算又便当，只不过我有自家个“小算盘”，就是少乘车，多走路，省出车钿装矿石收音机。

　　读书勿好迟到，早浪向个一角五分车钿勿好省，放学以后就随便我了。假使放得早，我就从曹家渡上车子买五分车票，乘足到淮海中路常熟路下车，再慢慢点走到屋里。假使晏一眼，就买一角车票，乘足到肇嘉浜路大木桥路下车，少走点路，好早点到屋里。礼拜六下半日勿上课，有好几趟我就从学堂走到屋里个。搿能一来，我每天就能从车钿浪省出五分或一角。不过有一趟垃拉学堂里白相得实在太吃力，上车呒没乘几站，就垃拉座位浪睏着了，一直睏到江边码头终点站也呒没醒。售票员一看我车票，老早过站了，就叫我补票，乃末我只好讨饶。还算好，因为我每天乘伊拉车子，售票员有点认得我，吃准我勿是故意乘过站，就挥挥手放我跑。从此以后我乘车子再也勿敢睏觉了。

　　就搿能，我每天坚持走老长一段路，筹足钞票买来零件，自家动手装。搿只矿石收音机硬碰硬是从脚底板浪“抠”出来个，虽然蛮苦，但也交关开心。

　　后来我高中毕业应征入伍。垃拉部队里向，勿论是农忙辰光帮当地老百姓插秧或割稻，还是军事训练辰光急行军或扛炮弹，作为城市兵，学生兵，我侪勿落后，呒没坍阿拉上海兵个台，搿个跟我当年勿怕苦，靠走路省车钿装矿石收音机个经历有邪气大个关系。