阴历六月初六，我个生日。“六月天，猫淴浴”。天热得连猫咪也出了大汗要求汏浴了。搿个一天个阳历是七月廿三日。上海闲话里有一句“搞七廿三”，形容整体复杂、难寻头绪，也形容为人为事七搞八搞，纠结难缠。搞七廿三，也使我个交关朋友因此记牢了我个诞生日。做搿个生日，七十趟了！

　　现在大家来讲高考恢复四十年。当时我勒上海面粉厂技工学校做老师，教机电数学，还教体育。文要解方程式，武要翻跟斗，有一点搞七廿三个。我是想去考浙江美院个，只因从小有个画家梦。艺术院校先来面试。认真仔细看了我个素描、写生作品后，招考先生讲我个年龄恰好过了三十足岁，勿能够报考了。伊还讲：“侬已经画得老好老好了，侬完全可以够格到美院美校去做老师了。再读几年大学，浪费了！”伊个辰光，我已经出版了好几本连环画小人书了，还是美协个首批新会员，算是个正儿八经个漫画家了。但是拨浙江美院回头生意，还是老吼狮个。普通大学院校随后招考，我已经呒没啥个心思去读大学了。我准备结婚了，忙得七荤八素。一天，到厂里大食堂吃中饭，大家扯到恢复高考，同桌个技校领导老徐问我会勿会考一记大学。我摇头。伊笑了：“我料定侬决勿会去个。考砸了，坍台。以后侬呒没啥个面子上讲台做先生哉！”同桌个老师傅、小青工也开心个笑成一片。弄得我个好强脾气一记头上来了，一拍台子：“好！考拨侬看看！”马上跟牢老徐到伊个办公室去填报考表。我教数学，当然要考理工科大学。老徐还难为我一下，讲只有文科报名单了，要理科个，要我自家去区招生办去买一张，五角洋钿。一勿做，二勿休，管伊文个武个。我当场就填了文科个，第一志愿复旦大学中文系文学专业。只考一趟，就挑名牌、头牌个上。够狠个。我呒没复习温习啥个功课。只花了半天辰光看了点政治题目，是问同样复习迎考个老同学讨教个。长话短讲，揭榜了，我以超过录取线一百多分个成绩考上了复旦。据说，我还是报考中文系个状元郎。有心考美院，吃了闭门羹。无心考复旦，大门八字开。哈哈，搞七廿三。开心。从此人生道路转弯了。感谢改革开放。也感谢老领导老徐。呒没伊挑我上山，呒没今朝个我。后来我是做新闻工作、做新闻官了。退休以后，市里领导安排我到松江大学城去挂职伊面个美院院长了。竟然被当初个浙美老师所言中，勿做学生，只做先生，还是头头。人生，真是搞七廿三，真是天晓得。侬讲呢？