老早个小菜篮头，辣拉上海人家个屋里向总有大大小小、各式各样好几只。

　　记得我小辰光，阿拉屋里向勿仅有五六只小菜篮头，而且侪勿是钞票买来个。因为我绍兴乡下个表阿弟是篾匠！伊每趟到上海来白相，总要送两只篾青材料编个新篮头，井深个一只，拨阿拉到小菜场买菜派用场；浅薄平底个一只，用来挂辣屋里房樑垂下个钩子上，篮头里好装四大碗剩菜剩饭。因为迭辰光侪呒没冰箱，挂起来总比囥了庎橱里要保险一点，老鼠偷吃难度会增加勿少！

　　但是，小菜篮头做了再好，辰光用辣一长，特别是经常湿溚溚个，邪气会烂坏脱。一般坏脱个篮头先用段铅丝穿补辣坏洞处，实在坏得结棍了，还好派大用场——代替自己排队！特别是过年菜场买年货，隔夜就要辣拉肉摊、鱼摊、家禽摊前各摆只坏篮头。乃末等排到了，顶多晏几个人买，勿会脱枪头，买勿到。

　　埃个辰光，啥人家个篮头，隔壁邻居、经常一道买菜个朋友侪有点数，基本勿会弄错，侬人呒没来，篮头就是侬，大家还会照看一歇。但一到开秤，侬人还勿到，排到后过脱也只好过脱，坏篮头白白里摆了。

　　后来，小菜篮头也升级换代了。大约上世纪80年代初，有人发明了先用3毫米左右粗个铁丝做好框子，再用打包用个白色废旧尼龙编织带来代替竹篾编制小菜篮，迭能个小菜篮头牢多了，一只好抵用竹篾做个篮头5只！再加上尼龙编织带有少数是蓝色、红色个，一眼心灵手巧个人隔花编，邪气漂亮！阿拉厂里起重工杨师傅曾经送拨我一只伊自己编个蓝白相间个尼龙编织带小菜篮，用到了我忘记脱为止。

　　再后来，塑料马夹袋盛行起来了，迭能一来，就再也呒没人用小菜篮头了。

　　可能大家勿相信，我现在还要经常用到“小菜篮头”！不过迭只“小菜篮头”，勿是竹篾或者尼龙编织带编制个实体小菜篮头，而是虚拟个“小菜篮头”，就是辣股市里根据股票个走势自己预估某只股票将会达到一个价位先下单买进或卖出个操作办法，上海闲话叫“吊篮头”！因为我有个老同事一直讲我白相股票胆子太小，只能赚点小菜铜钿，甚至葱姜铜钿，因此我就自说自话索性拿“吊篮头”自嘲为吊“小菜篮头”了。