最近随着上海大戏院修缮后重新开放，大家纷纷怀念起老底仔个影剧院，勿晓得侬是否还记得，勒拉静安寺百乐商场角落里曾经有家电影院？

　　典型个“螺丝壳里做道场”，勒拉相当有限个地盘上硬是“堆”起一座三层楼个影院，活脱脱像一座塔。印象当中，上海三层楼个影剧院除了天蟾舞台，就是伊了，伊就是“大沪电影院”。

　　整座建筑又小又高，楼梯就陡得吓人，假使到三层楼后排看电影，实在有眼吓丝丝。因为离屋里近，小辰光就经常去，“吓丝丝”个三层楼也坐过。要是有恐高症个话万万受不了，不过比“吓丝丝”更加难忘个是，勒拉搿种塔筒形建筑里看电影，人多再遇上夏天，热空气朝上，热到三楼就可想而知了。老早呒没空调，全靠从天花板垂下来个电风扇，由于高，吊电风扇个铁杆子老长老长，从顶上吊到一楼，但要是勒拉三楼又是靠边个位子，看电影就像是隔了一排铁栏杆。迭种座位票价便宜，呒啥铜钿个小朋友就勿得勿常常“隔仔栏杆”看了。

　　每到大伏天，光靠吊扇解决勿了大汗淋漓，影院就勒拉进门时发扇子，人手一把。伊种扇子其实就是一根半寸宽个竹片，将一头劈成一根根枝丫，张开后，两面用圆形个广告纸一糊，另一头就是扇柄了，既可以驱热，又做了广告，广告大多就是花露水、痱子粉之类。看完电影出门时，门口有一大木桶，大家拿扇子扔进去。到了夏末扇子也就光剩“骨架”了。其实影院与商场是互利个，去看电影势必要先经过商场。如今八佰伴、正大广场、梅陇镇、美罗、广汇等侪附设电影院，连新天地刚刚火起来时，香港电影大佬程思远先生也赶紧往里塞进一家影院。由此看来，迭座已经从很多人记忆里抹去了个大沪电影院算得上是伊拉个祖师爷。

　　上世纪七十年代初，百乐商场和大华影院一道拆掉了，沿牢万航渡路造了一幢体格庞大个“第九百货”。现在“第九百货”股票名称还勒辣，但原来地方已勿经营百货。要是迭座三层宝塔状个影院能保留到今朝，大约可以成为上海滩一件宝贵个文化古董。可惜了！