辣拉我十几岁个辰光，每到过年前个一个礼拜，印象最深个就是一片忙碌，屋里向要大扫除，玻璃窗揩清爽，地板用老碱水刷一遍，板壁浪个糊墙纸也要换上新个，搿种上蹿下跳个生活，爷娘就交拨我了。另外，上海人家侪要磨一缸糯米粉，包猪油黑洋酥汤团比干粉细腻，搿个生活我也逃勿脱。阿拉祖籍是浙江绍兴，过年有三只菜是准定要备齐个：水笋烧肉、黄鱼鲞烧肉、黄豆芽烧油条子。水笋用淘米水发好后，也要我切。姆妈一再关照：切得越细越好。其实迭个辰光弄堂里自有乡下人掮着长板凳来叫唤切水笋个，腔调就跟磨剪刀一样，但是姆妈要省几只角子，叫我切。满满一大砂锅水笋切好，勿但手上起泡，浑身骨头也散脱了。

　　所有生活停当，养辣一只青花大海碗里个水仙花一声勿响个开了，寒冬腊月光线勿足个后厢房就弥漫起淡淡个幽香。接下来阿爸买来红纸头，裁成长条写春联，伊是照着毛主席诗词写个，写好后要我跟伊一道反复读几遍，生怕写错脱。贴好春联，弄堂里就响起了鞭炮声，我想下楼看闹猛，被姆妈一把捉牢，要我摊蛋饺。心里一百个勿情愿，唉，我哪能像童工一样苦啊！再一想，四个哥哥侪辣海外地，最远跑到黑龙江跟新疆，过年了，伊拉会勿会回来呢？

　　四个哥哥总有一两个会辣搿一年个春节回来探亲，我也盼望伊拉回来。哥哥回来总会带点土特产，屋里向个小菜也会好一点。晓得伊拉回来了，上海及周边城市个亲戚也更有理由来拜年了。哥哥们（后来再要加上嫂嫂们），我个七大姨八大姑还有堂兄弟表兄弟等等，有辰光正好同一天来，济济一堂，欢声笑语，屋里向个地板辣抖豁，水仙花个叶子也辣抖动。吃饭要开两桌，圆台面摆开要分先后，凳子勿够到邻居屋里去搬。我帮姆妈打下手，顺便偷吃一只蛋饺一块熏鱼，搿是我个福利。到了廿岁出头，我也会烧整桌头个菜了，围单一系神气得很，亲戚侪表扬我烧得“跟饭店里一样”，我个诀窍其实就是多加味精多加油。老酒吃过三巡，大家就会交换各种小道消息，送菜个辰光听到几句，耳朵竖得老高，阿爸事后关照我：“勿要到外头乱话三千啊！”

　　大家来拜年，吃饭问题还好解决，夜里睏觉就麻烦了。我记得有一年过年屋里向共总有十四个人，一张大床，一张小床，一只阁楼，再打只地铺，算来算去只摆得平八九个人，还有五六个哪能办？我真替姆妈捏把汗，想勿到她大将风度，照样笑嘻嘻，还吩咐我去烧一锅浆糊，要拿我四个从杭州来个表兄表姐糊辣墙头浪，真是笑煞人。最后，姆妈领伊拉到楼下前厢房去睏，这家邻居正好去乡下过年，姆妈事先跟伊拉要了钥匙。

　　还有一年，阿拉屋里向来了一位老长辰光勿联系个远房亲戚，听说辣香港发了小财，伊到了上海就住进南京西路华侨饭店，每夜天14块港币，相当于当时职工平均工资个四分之一，老吓人噢。我跟阿爸去看伊，搿是我第一次走进高级饭店，大气勿敢喘，脚底下打飘。进了客房，吃过奶油蛋糕跟仔咖啡，收下见面礼（红包事后要上缴个），有人笃笃敲门，是服务员来送开水，亲戚接过热水瓶，表示“三克油”，随手塞拨伊两块港币。我又吓了一跳，搿是资本主义社会流行个小费嘛！再讲两块港币太结棍啦，当时老虎灶里泡瓶开水不过一分洋钿嘛。更过分个是，阿爸向迭位亲戚宣传祖国个大好形势总共花了一个半钟头，服务送了四趟热水，进账八块港币。我真想跳起来跟迭位香港亲戚讲：爷叔，开水我去泡，小费侬就拨我算了。