冷天个太阳是珍贵个。到冬日个太阳下面去享受阳光，北方人讲个是晒太阳。上海人勿然，上海闲话讲是孵太阳。孵是一个有味道个词眼，看上去伊有点一动勿动，而实际上伊却外静内动，伊辣安静中散发着生命个气息。上海人用到孵个地方还有一个：孵咖啡馆。咖啡馆是一个交际会友个场所。孵辣里向，品品浓香咖啡，看看周围个人生世界，完全是一副以静制动个姿态。我欢喜孵咖啡馆。

　　老晚报复刊之初辣九江路靠外滩个一幢老个洋楼里，离大名鼎鼎个中央商场仅百步之遥。中央商场靠南京东路一端有一个上下两层个东海咖啡馆。阿拉报社个一批编辑、记者只要有点空隙个辰光就钻到东海去了。人少个辰光，两三知己孵到靠窗个火车座位上，吃吃咖啡、看看街景。人多个辰光，可以拿几只小方台拼成一长条，天南地北，茄茄山河、吹吹牛皮。东海咖啡馆里最多个是上海滩个一大堆老克勒。伊拉常常是洋装笔挺，头发锃亮、皮鞋锃亮，功架十足。老克勒们对老上海个怀旧辣一言一行、一招一式中散发出来。伊拉拿淮海路叫作霞飞路，拿复兴公园叫作法国公园，拿茄汁浓汤叫作罗宋汤，拿打台球叫作打落袋。老克勒好像还生活辣老底仔个上海滩。就是伊拉个时髦也是老古董式个派头。伊拉固执得可爱。还有一大群新潮流个脚色孵到东海咖啡馆里来，伊拉是中央商场里占到了摊位个小老板。生意空个辰光，伊拉到此地来攀谈生意经。衣裳从啥地方批来，皮带到啥地方出货。赚铜钿是主旋律。小老板里女个老板娘不少，伊拉轧了一道更加闹猛。除了谈打扮、谈化妆，打麻将是伊拉个中心议题：“昨么子我个一副清一色我摸到了绝三万！”“啥个希奇勿煞，我前天大吊车杠开了！”伊个辰光，阿拉还刚刚入门麻将，听伊拉个麻将经就好比听教授上课，一响也勿敢响。

　　东海咖啡馆个价钿老便宜个。一桌人孵了一个下半天个开销勿会超过几十元。大家抢了埋单。三日两头碰了头个顾客也面熟陌生起来，有辰光拼了一只台子吃咖啡，会有老克勒或者小老板替侬会钞：“勿要客气，下趟再碰到由侬来请客！”后来单位搬到新个大楼去办公了，老地方、老辰光个朋友就走散了。我也是怀旧个，我还寻回到东海去孵脱一歇。咖啡座里已经呒没熟人。倒是几个老服务员还记得我：“长远勿见！侬个一班写文章、拍照片个朋友呢？”现在中央商场改建，东海咖啡馆也人去楼空了。淡淡个、幽香个咖啡味道仍旧拨我一直记得老牢个。唉，怀念。