老早辰光个电影院，大门两边侪有两大块张贴电影海报个地方，上面画着电影里最经典个画面。两幅画个下角，分别写着“今日开映”、“下期开映”字样。迭种电影海报，因为面积大，老远就能看见；又因为画得生动逼真，交关吸引人。电影海报画得好坏，搭仔电影生意大有关系呢。

　　记得上世纪六十年代初，《红色娘子军》上映，电影海报浪，主角人物吴琼花个两只眼睛好像要喷出火来；紧抿个嘴角也露着坚毅、倔强、复仇个神态，非常吸引人。后来，《51号兵站》《铁道游击队》《李双双》等影片相继放映，电影海报侪起到了老大个宣传作用。

　　电影海报侪是人工手绘个。由于面积相当大，一幅画，往往要用交关整开个纸拼凑而成。埃个辰光条件差，画海报人员要算准日脚，啥辰光画好，啥辰光贴出，勿能脱班个。同行之间，还要别苗头。

　　张贴电影海报总会吸引老老多个路人观看，一般尽量拣呒没风个上半天。有一趟，我正好走过沪西电影院，看到里向头出来两个人，一个人身着藏青色个大褂，身浪向、袖子口，侪是各种颜料痕迹，胳肋肢窝夹仔一大卷画纸，看伊个风度，就晓得是个画师；另一个掮仔八脚扶梯，一只手拎着一大桶浆糊，用勿着讲，迭个人是帮手。两个人拨手里个纸卷、家生摆辣墙角边浪，先搁好扶梯，爬上去撕脱原来“今日开映”个画面，有个地方因为贴得太牢，还要用铲刀铲去一层，弄得地浪一大堆纸屑垃圾。等版面浪一塌刮子弄清爽，再操作下一步。帮手先上去用大刷子刷浆糊，贴好上角浪向一张，按顺序，从上而下。画师就辣下面“监工”，指挥调整角度，保证拼接质量。旁边看个朋友，也蛮热心，一道帮忙喊：“右角高一点，左角低一点。”尤其是人面孔，推扳勿得一眼眼。假使人物个鼻头贴歪了，还会引起“观众”个哄笑。有两个捣蛋鬼还会存心叫：“蛮好！蛮好！”场面邪气闹猛。迭个辰光，上街沿人山人海，连人行道下面也立了勿少人。交通警察也管勿了介许多，眼开眼闭，顶多叫一声：“大家往上街沿靠靠！”海报贴到一半，看客人群里，还会有人打赌，下期放啥？主角是啥人演个？等等。

　　当然，大家主要是来欣赏海报个。有一次，新贴上去个是电影《甲午风云》海报，李默然扮演个邓世昌，交关有气质，非但形似，而且神似，连伊面孔浪个粗皮粒子也画得入木三分，邪气逼真。

　　现在网络时代，新片宣传方式、手段更丰富先进了，勿再需要各家影院自家绘制电影海报。然而，阿拉搿辈人，还是老怀念埃些年份个电影海报个。