滑稽艺术表演大师袁一灵去世多年，但是伊个舞台形象一直辣海上海人个心里。粉碎“四人帮”后，滑稽戏重新上演，袁一灵辣戏里演一个做奶油话梅个老师傅。“文革”当中批判做奶油话梅个老师傅，讲伊做奶油话梅是为封资修服务，伊是反动学术权威，打得伊浑身是伤，血溚溚渧。袁一灵叙述搿段经历，有一句台词交关灵光：“伊拉勿拿我当奶油话梅，打得我是像拷扁橄榄。”当时剧场里爆发笑声。迭个是滑稽戏需要个效果。同时，迭句台词经得起推敲回味。一、台词搭角色邪气般配，三句勿离本行。二、比喻特别恰当。拷扁橄榄制作第一步就是“拷”，要拷交关辰光，拷得皮开肉绽，然后腌制才能入味。“扁”迭个字真是体现了上海闲话个多采，非常形象个表达了拷打个沉重，用辣人身浪，自然就是残酷。三、还有一点含义需要挖掘。阿拉小辰光吃拷扁橄榄侪晓得橄榄肉豁开来，里向核是完整无损个，迭个也体现了皮肉虽然受到摧残，但骨气仍旧保持石骨铁硬。

　　人家侪讲吃檀香橄榄回味赞，而迭句“拷扁橄榄”个台词让我回味一直老浓个。“文革”时批判滑稽戏“庸俗、肤浅”，实在是硬装榫头。袁一灵个迭句台词称之谓隽永，一点勿过分。