上海人一定还会记得足球人王国林个。十多年前个上海滩有两支名气乓乓响个足球队，一个是老牌子个申花队，一个是新品牌个中远队。王国林就是中远俱乐部个副老总，伊可以算是球队对外个发言人。王国林以一口上海闲话来应付各地媒体个采访。凡有挖空心思个老记来打探球队个动向，王国林常常以一句“瞎讲”来关脱大家个问号。上海闲话“瞎讲”等于北方人讲个“胡说”。外地记者弄勿懂上海闲话，按音照录之后就记成了“哈讲”。一段辰光里，“哈讲”成为王总王国林个代名词。王国林最出挑个一个段子是伊请当时红遍足坛个金哨裁判陆俊吃了一记生活。陆俊执法中远队个一场关键比赛，明显偏袒对方、欺压中远。中场休息陆俊辣走道里拨王国林拦下评理，拉拉扯扯中金哨被挨了一巴掌。金哨后来被证实为墨墨黑个黑哨，进班房去哉。王总怒劈金哨、陆俊抱头鼠蹿成为绿茵场上个经典。我当时在场，有幸成为目击者。王国林值得敬佩。

　　瞎讲，很干脆。上海人还会讲瞎三话四、瞎七搭八，意思是一样个。讲了以后还有动作出来，就是瞎乱撞了。乱来一气，勿辣正规正常个路数上，叫别人家看勿下去。“搿根电线搭伊根电线勿是一路个!勿懂勿要瞎乱撞，要弄出人性命个!”比瞎乱撞稍微轻了一层意思个胡来蛮搞，上海人称之为瞎乌搞。瞎乌搞是有一些上海人捣浆糊个手段。“腌笃鲜个汤水里侬放香肠进去，真是瞎乌搞!有搿能介个烧法？”上海人自嘲自家做勿来就会讲“瞎弄弄”。“夜饭小菜烧好哉。瞎弄弄个，味道还算过得去!”对付瞎乱撞、瞎乌搞、瞎来来，客气一点个上海闲话是：“请侬覅瞎起劲!”瞎起劲就是假积极、瞎积极，领受勿到表扬个。

　　以瞎字打头个上海闲话有交交关关。瞎，除了眼睛失明个意思外，可以讲是一个副词，非常，极其，是用来比喻程度个。瞎嗲，瞎好看，瞎漂亮，瞎光生，瞎结棍，瞎硬，瞎软，瞎热，瞎冷，瞎烫，瞎亮，瞎暗，瞎穷，瞎有铜钿，瞎大、瞎小、瞎长、瞎短……勿好意思再瞎下去了。一时头是瞎勿光个。老上海看到此地，要请我吃排头了!“瞎来瞎去，是瞎和调了!”弄出来介许多瞎，再下去要成“瞎话三千”了。就此打住。

　　答案：1.A 2.D 3.B 4.D