阿拉小辰光住勒南京路旁边一条弄堂一幢四层楼房子里，一个楼面有几家人家。烧饭烧菜辰光就侪勒拉只有十个平方勿到一个小个空间，阿拉叫伊——灶披间。

　　阿拉住勒两楼，有五家人家，一到烧饭辰光人侪出来了，大人烧饭烧菜，阿拉小人欢喜勒拉灶披间轧闹猛，每家人家小人侪轧勒大人边浪，大人烧好菜会杀杀馋，先让小人尝一口。阿拉小人侪是生勒上海个，小朋友之间讲闲话侪讲上海话，但阿拉爷娘辈侪勿是上海出生个，五家人家从各个地方来，有福建、广东、山东、浙江绍兴，还有阿拉浙江宁波，蛮能体现上海搿座城市五方杂处特色个。阿拉爷娘们侪讲勿来正宗个上海话。就是讲也是洋泾浜。阿拉小朋友就做伊拉翻译。

　　灶披间闹猛了勿得了，福建人家出来，一家门自家相互交流就讲闽南话，别人家一眼听勿懂，广东人家自家就讲广东话，反正每家人家交流就讲自家家乡方言，所以,尽管勒拉一个小小空间，“私密性”倒是老强个。

　　阿拉灶披间常常充满了节日气氛，山东人家包饺子，就会送每家人家满满一大碗，饺子是韭菜馅，阿拉小人侪老欢喜吃个。福建人家包燕皮馄饨，老鲜个，阿拉屋里大人一只都呒没吃侪是阿拉小人吃光。有辰光广东人家做糕了，每家人家分一点。绍兴人家屋里来了家乡人，带来一麻袋梅干菜，每家人家分一大包，阿拉姆妈马上从抽屉里剪下一张肉票，跑到菜场买了一块肋条肉，回来搭梅干菜一道烧起来，整幢房子都香喷喷。我一下子好吃两碗饭唻，真叫吃得开心。

　　每到冬天阿拉姆妈就要去楼上或者楼下借磨子，磨水磨粉，第二天用纱布沥干，用猪油黑洋酥包汤团，姆妈手交关巧，汤团包了小而皮薄，烧好了，只只透明，呒没一只露馅个，正宗宁波汤团，送个任务就交拨我了，我一家一家去送，我搭姆妈讲，汤团做了大一点，送人有面子。阿拉姆妈讲我勿懂，做了大送人太粗糙，隔壁人家侪是知识分子呀，侬当人家大老粗啊！我觉得姆妈讲了有道理，拿汤团端过去勿觉着呒没面子了。

　　后来,阿拉小人侪长大了,工作了,成家了，有个人家分房搬走了，有个买房搬跑了。当初个小人现在头发都白了。不过，还常常回老房子看看，有辰光阿拉还带上自家个小人回原来个房子看看，还特特为到灶披间看看。现在老房子又住进了新上海人。看看整幢房子还是原封勿动，就像回到了故居，有青春见证地方。现在老房子动迁很多，有蛮多人侪眼热阿拉有老房子勒海,回去看看,就像回到了童年,寻到了青春,里面还存放了阿拉过去个生活记忆，还可以搭阿拉下一代讲讲故事,真是邪气珍贵。