老底仔个大热天是上海弄堂里寻相骂、吵相骂个多发季节。上海闲话里个寻相骂和吵相骂一样意思，相等于北方人个吵嘴和吵架。吵相骂是对当事双方个公平评解。吵来吵去、骂来骂去，大家个责任差勿多，半斤对八两。寻相骂是指发动战争个一方，开骂动嘴是首先挑动事端个脚色。寻相骂个苗头一般是从寻吼势开始个。故意找出寻出一点叫人家为难个事件来拌嘴殴气，是寻吼势哉。吼势形容讲勿出、话勿出个难过难受。比寻吼势要进一步个挑衅是寻轧头。轧头勒上海闲话里个本意是指夹子，到了此地是比方为岔儿、岔子。从一方寻吼势或者寻轧头开局，另外一方勿退避三舍、偃旗息鼓，葛末相骂就算寻到了，吵相骂必定开幕了。

　　老上海人吵相骂勒一天当中个场次也是有点讲究个。早浪向，大家要忙着漱洗打扮，吃早饭，忙着出门上班读书，所以早早场吵相骂还是少见个。到了中浪向，是一天里个热中心，搿个辰光来吵一场相骂是太伤精神、太花力气。因此午场还是静悄悄个。到了夜快头，天气风凉一点了，楼上楼下、大小弄堂里个人也多起来了，时间、地点、人物个条件具备了，搿段辰光里吵相骂个事体最多最闹猛。邻居隔壁个相骂内容要么是大家勿谦让。一幢房子讲有七十二家房客是夸张了，但是三、四家，五、六家人家轧勒一只石库门房子里过日脚是当时上海滩个常态。为了公用地方个占用、公用水电个分摊引起个相骂是持久战。为了小囡之间个白相经引出个矛盾也是骂山门、嚼舌头个导火线。相当有趣个是双方个大人还气鼓鼓个寻相骂时，一对惹事体个小囡已经和好如初，迓到横弄堂、过街楼下头重新白相起来了。搿个是弄堂里个战争与和平。

　　屋里向个一家门人吵相骂也是上海屋檐下个常规演出。夫妻之间、婆媳之间、兄妹之间弄出勿开心，大家呒没好声好气，内战就此开打了。上海闲话当中形容寻吼势个词汇交交关关。有捉扳头、有扳差头，有扳鹊丝，有装榫头，有戳壁脚，有翻毛腔。意思相差勿远，是硬找岔子，是瞎找麻烦，是专找碴儿。内中个细微相别，也只有老上海人方能感觉和领会到。现在个上海吵相骂个故事要少脱匆匆少少。一是素质勿断提高。二是居住条件有了根本改善。老弄堂里相骂多。新社区里相骂少。由此，可以看出上海个进步，是？