清明一向比较受民间重视，垃拉老上海伊个风俗就有勿少。 

　　清明搿日，有交关人会去插柳。关于清明插柳有迭能个传说：春秋辰光，晋文公回忆自家继位前头流浪个苦日脚，记得有一趟实在呒没东西吃，介子推居然割了身浪个肉，伊想想老感激个，就派兵放火烧山逼迭位隐士跑出来做官，但介子推坚决勿肯出来做官，情愿抱牢老柳树垃烈火当中死脱；晋文公愧疚得勿得了，马上规定每年搿日“禁火寒食”，第二年清明还亲自从复活个老柳树浪折枝插垃宫门口表示纪念，老百姓侪学样垃屋外插柳。宋朝个梅尧臣来过上海一带，伊写个《寒食》诗讲：“荒山野水非吾土，寒食清明似去年。杨柳插门人竟笑，吴儿不信子推贤。”迭个说明，埃个辰光清明插柳已经垃江南地区流行。到仔明清时期，上海人搿日勿仅垃门外或者窗浪插柳，还有蛮多男小囝侪欢喜头戴柳叶环、小姑娘侪欢喜拿嫩柳枝结花球佩垃鬓边。迭能做到底是为了啥？原来，清明也拨拉看作“冥节”，柳枝恰巧绽绿，古书浪叫伊“鬼怖木”，大家就拿伊驱“野鬼”；另外，春暖后细菌开始繁殖，柳叶属于常用个一味中药，具有清热、解毒等功效，大家当然侪高兴垃门前或者身浪闻到伊个缕缕幽香，以求祛病健体。既然插柳、戴柳、佩柳有祈吉祈福个意思，又可以显示出生机，乃末搿个就成为一种时尚，而且流传过“清明勿戴柳，红颜变皓首”、“清明勿佩柳，来世变黄狗”个民谚。 

　　清明搿日，交关人也会到城外先人个坟头浪拔草、盖土，再点香烛、摆供品、烧纸钱，俗称“上坟”或者“扫墓”。晚清张春华个《沪城岁事衢歌》讲：“江乡令节重三元，春露秋霜慰九泉。听彻莺啼寒食路，草坛风紧腻晴暄。”迭搭块提着个“草坛”，通常叫做“草甏”，伊是拿麦秸编成个，样子有眼像饭草窠，有底有盖头；清明烧“草甏”，是本埠顶特别个一种习惯。因为老早富裕人家经常拿银元摆垃甏里向埋起来，防备贼骨头上门偷窃，所以“甏”相当于“银箱”；“上坟”个辰光，垃草扎成个甏里向摆满锡箔一道烧脱，就赛过是拨仔已经归西个前辈一箱子钞票。 

　　搿日，交关人还会拿青团、蒿饼当祭祖宗个供品，当送拨亲友个礼物。垃清明节前头，自家动手做青团、蒿饼，是一桩蛮有趣个事体。根据有个笔记文献里向讲，老早青团个做法是：让艾蓬汁或者麦青汁搭糯米粉融和，再包进豆沙、枣泥馅子，拿芦叶衬底入笼蒸熟；蒿饼个做法是：垃糯米粉里向均匀揉进嫩蒿芽汁，捏成甜个饼、咸个饼，既可以入笼蒸熟，也可以下锅煎熟。青团、蒿饼侪颜色碧绿，清香扑鼻，风味独特。 

　　除此以外，踏青、放鹞子、荡秋千、踢毽子咾啥，也是搿日个活动。老上海个清明，大家真是来得忙！