答:“我”搭“吾”古代侪是疑母字，声母相同侪读后鼻音【ng】，“我”是“五可切”，“吾”是“五乎切”。“五”，上海话读【ng】，用上海话读搿两个字，声母韵母相同，侪读【ngu】。但是，“我”是阳上声调字，“吾”是阳平声调字。虽然“阳平”、“阳上”搿两个声调辣现今个上海话当中已经合并，但是辣过去个上海话搭仔现在辣上海郊区个老上海话搭松江话当中呒没合并。1853年英国传教士艾约瑟出版《上海方言口语语法》辰光，县城上海话还有8个声调，第一人称单数【ngu】是读阳上声调个，所以记“我”字，后来个上海话著作中侪写“我”。现在上海郊区、苏州等吴语地区侪读上声，所以上海话用“我”是正确个，写“吾”是错误个。勿能够从普通话个现今读音个角度出发来误读中古音，再来对上海话认音。