保护搭仔传承上海闲话已经成为一个热门话题，我觉着明年春节上海滩浪鼎鼎有名个大众化个文化娱乐场所《大世界》就要重新开张了，阿拉是勿是可以垃拉大世界里建个“沪语乐苑”呢？

　　沪语乐苑是一个集上海闲话保护、讲习、展示、交流、游乐、传播为一体个文化活动场所，是活个沪语博物馆。垃搿里向，可以听得到上海闲话传承人个语音库里头标准个发音；可以看得到上海闲话个书籍、教材（书面、语音、图像）、报纸、杂志；可以有趣味性个学讲上海闲话个小课堂；可以举办上海闲话讲“闲话擂台赛”、“知识竞赛”；可以有用上海闲话讲（再加上打普通话字幕）个上海人生活滑稽情景剧；可以用上海闲话讲故事；可以播放用上海闲话配音个反映上海历史与现状个电影、电视，还可以请观众现场拍录DVD；可以请沪语专家、著名演员、著名主持人搭参观者互动交流；特别是要集中演出沪剧个经典剧目或者片段，说唱沪书、锣鼓书、宣卷，演唱沪语歌，演出滑稽戏，让专业个演员搭业余个爱好者轮番上场；还可以垃里向头现场录制节目通过广播电视播出。让大家垃”沪语乐苑“当中得到听、讲上海闲话个快乐。

　　垃现在，上海有条件集中全市个语言、民俗、群文、史志、艺术、社科、媒体、出版咾啥部门个聪明才智跟创造能力，特别是依靠全市人民一道努力，是可以拿“沪语乐苑”办出特色来个，是可以吸引更加多个人通过迭种寓教于乐个方式来体会到上海个城市文化所独有个乐观向上个搿种氛围个。

　　至于地方末，我觉着《大世界》是最合适了，放垃搿个最有民俗地方色彩个大众文化娱乐场所是再适当勿过了：因为大世界本身是京、昆、沪、越、甬、潮、评弹、滑稽、杂技、魔术等各种戏剧、戏曲、曲艺咾啥表演形式竞技、竞艺、竞赛个场所，也是具有海派特色个上海地方文化个展示场所。白相大世界，还能够听到正宗好听个上海闲话，勿要忒好噢！