小辰光要是轮着学堂里或者爷娘领阿拉到西郊公园（现上海动物园）去白相，肯定是桩老老开心个事体，可以整整白相一日天唻。不过老早子垃拉上海市中心南市搿搭块还有过一家大型个动物园，搿就是“上海市市立动物园”。

　　市立动物园垃拉1931年8月立项申请。同年10月获得批准。划定原芹圃旧址（今朝学前街、蓬莱路、中华路、文庙路当中一块地方）为动物园园址。1932年8月由三森公司中标翻造。整座动物园占地10亩多一眼。里向猛兽棚4间、大象棚1间、热带动物棚一排6间、鹿棚4间、小动物棚12间、野猪棚1间、骆驼场1座、水禽棚1间、孔雀棚1间、小鸟亭2座、鹰棚1间、杂禽棚1间。用埃辰光个眼光来看，动物还算蛮多个。《申报》先垃拉1933年7月31日登出预告，8月1日正式开园，马上引起轰动。动物园开放辰光一般是每日上半日8点钟到12点钟，下半日2点钟到6点钟，中浪头休息。假使夏天介或者冷天介则作相应调整。老百姓要想进动物园白相，必须买票子。门票分常年、成人、儿童军警三种。按规定常年票每张银洋1块，1年内有效；成人票每张6只铜板（1块银洋大概兑换500只铜板）。凡是身高垃拉1米44以下个小朋友以及穿制服带徽章个军人、警士，可以享受半价票。各个学堂团体或者机关团体要想参观，要出示正式公函预约，动物园会得拨伊拉优待，免购门票。

　　上海人向来有“轧闹猛”习惯。开园头一年（即1933年8月到1934年7月），就有116万人次游园白相，大概占当时全市人口的三分之一。勿少学堂拿动物园当作启蒙教育场所，经常组织学生来参观学习，从小培养学生对自然科学个爱好。全国各地也先后有交关学堂专门跑到上海来参观游览。市立动物园里个动物除脱少数由公共学堂移交之外，其余侪是新买个或者同外省市动物园互相交换个。为了

　　增加动物品种，当时个上海市市长吴铁城、财政部部长孔祥熙、上海市社会局局长潘公展带头以私人名义，分别向市立动物园捐赠了锦鸡3只、白鹤1对和豚鼠3只。乃末社会各界人士包括外国人也纷纷学样，像虎标永安堂大药房上海分行受堂主胡文虎委托，捐斑斓猛虎1只；上海市警察局曹家渡分局捐麂1只；法国公董局花园办公处捐法国冬青50棵；另外还有交关市民捐赠了动物和植物。到1937年抗战前夕，市立动物园已经有动物109种，其中哺乳类41种、鸟类54种、爬行类8种、两栖类2种、鱼类4种。动物标本82件。

　　正当动物园全体职工准备大试身手个辰光，“八一三”淞沪抗战爆发，日本人进攻上海，战火老快就烧到南市文庙一带。为了防止动物拨飞机炸杀或者从铁笼里向逃出来伤及

　　无辜，市立动物园征得当时法

　　租界当局同意，拿老虎一类猛兽跟珍稀动物转移到顾家宅公园（今复

　　兴公园）寄养。1937年11月，当时个市政府因为形势危急撤离上海，动物园经费来源断绝。为了避免动物饿煞脱，只好拿动物统统送拨法租界当局。从此，上海市立动物园垃拉上海地图浪向消失。