听讲大世界游乐场将要重新开张了，迭个是上海人个一大盛事。由此我想起了当年个大新游乐场、先施游乐场，搭仔小世界游乐场（勒辣福佑路老城隍庙后门），尤其是大新游乐场，因为少年辰光经常去白相。

　　讲起大新游乐场，就是老早仔大新公司（1953年改为中国百货公司上海市第一百货商店，简称中百一店）辟设个游艺场所，商店名称改了，游乐场仍旧叫大新游乐场。以前个大新游乐场主要勒六楼到十楼，有马戏台、罗跨亭、藏春坞、银河桥、御风楼、来青馆、螺丝馆、剪淞亭、青云路、袖潮楼、鱼俪轩、万花棚、凌云阁、垂虹泾、五福亭和溪山小筑等游览去处，总称“天台十六景”。等到我去白相个辰光已经几乎呒没了。当时大新游乐场搭大世界一样，开设京戏、话剧、电影、滑稽、魔术、武术等等演出节目。因为我从小喜欢京戏（勒小学四年级辰光还勒先生指导下，成立了京剧团，我还是团长唻，还勒辣向明中学演出过。算算快一个甲子了，像煞还勒辣昨日），所以我到大新游乐场主要是看京戏。为啥勿勒大世界、先施看？两个地方侪有京戏，迭个是因为我崇拜京戏武生筱高雪樵（迭个辰光几个小学同学都迷上武生），看伊个演出。筱高雪樵扮相俊伟、功夫扎实、开打激烈，伊个《挑滑车》《走麦城》《擒张诚》《金钱豹》《狮子楼》《驱车战将》看得我眼花缭乱、神魂颠倒。每隔一段辰光个礼拜天，总要花两角洋钿买张票，看两场京戏，下半日一点半开场，夜里七点钟开场，有辰光饿了肚皮看到夜里散场，回到屋里扒冷饭，大人想想心痛。搿歇辰光个条件勿像现在，肚皮饿了，只好买块兰花豆腐干充充饥（两分洋钿）。

　　筱高雪樵有眼来头，是京剧南派武生巨擘高雪樵个侄子，七岁登台演出，长短靠武生兼麒派老生。五十年代一直勒辣大新游乐场献艺，后来调入新民京剧团，与新华京剧团个王少楼同为海上两大武生台柱（王少楼人称江南一条腿，武功了得，伊主演个《十八罗汉收大鹏》《忠王李秀成》等我都看过，真刀真枪、武打过硬，现在要看到迭个武打，恐怕蛮难）。后来读中学了，功课毕竟多，礼拜天难得有空，再讲小学里有志于唱京戏个同学侪各奔东西，自家个兴趣爱好也转移了，勿常去看京戏，大新游乐场也勿去了。到六十年代中期，大新游乐场索性关掉了，当然先施游乐场、小世界也一道关脱，只剩大世界了。其实大世界也命运多舛，开开关关，直到今朝还“门虽设而常关”，可惜可惜。据报浪讲，明年大世界将要开张，实在是民心所向，为上海重新竖立起标志性景点搭之娱乐场所，其中个意义不言而喻，是。讲起大世界，就想起了大新游乐场，乃末就有了迭篇文章。