有交关上海闲话侬一定先要听得懂，再能讲得对，否则勿但会闹误会，弄勿好还会出事体——

　　譬方讲，有个朋友勒屋里过生日，有个请来吃寿面个要好朋友事先勿晓得，进门一看到庆贺场面才明白自家失礼了，伊会拍着脑袋叫起来：“喔哟！是侬做大寿啊？真要死【xi】快了：我一点勿晓得空手来了……”

　　外乡人一听可能会大惊失色：就算朋友再好，人家过生日个吉时良辰哪能好讲迭种“触霉头闲话”？接下来伊会更加吃惊，朋友一家门会统统围上来表示欢迎，好像得到了最美好个祝愿。

　　老上海啥人勿晓得“真要死快了”是沪语中出现频率蛮高个口头语，有多重“内涵”；刚刚听到个“真要死快了”只不过是迭位老朋友表示对自家失礼个责怪；大家围上去欢迎，也就是表示老朋友“空手来”毫无关系，勿必当真讲自家“真要死快了”。

　　迭个就是上海闲话当中有趣个“一语多义”现象——所以，勒上海攀谈当中，听话勿单要听“音”，更加要知“义”。 

　　“真要死快了”勒吃惊时使用，可以表示简直难以置信：“真要死快了！迭条鱼剖好个把钟头了，放进煎锅还会跳？”搿搭个“死”是讲搿条鱼勿可思议竟还“活”着……

　　“真要死快了”勒叹为观止时使用，可以表示自家孤陋寡闻：“我活了迭把年纪，从来没有听到过老母鸡早上会打鸣。真要死快了。”此地块个“死”是讲母鸡竟一反常理，具有如此“特异功能”……

　　“真要死快了”勒懊悔痛失良机时使用，表示对时勿再来个追悔莫及：“我买个彩票脱大奖只差一位号码，早晓得抢先付好铜钿早一步拿到手，今朝要笑勿动了。真要死快了！”搿里个“死”当然是怪自家“慢了一拍”只好与“发财”失之交臂……

　　“真要死快了”甚至还可以勒特定环境中为“模拟明星”者点赞：“乖乖！我刚看到侬，还以为是佟大为（范冰冰）来了呢！真要死快了！”搿里个“死”看似怪自己眼钝，实际上就拿陌生朋友一记头“捧”到云里雾里，将两家头个“距离感”拉到了零……

　　当然，勒各式各样个“语境”中伊还会有种种别个“妙用”，但总个看来，迭句“真要死快了”，总归是一种强烈真挚个情绪流露；如果加上使用者个面部表情搭肢体语言自然配合，讲者会觉得淋漓痛快，听者也会因为心领神会而受其感染。

　　要提醒个是：“真要死快了”勒搭年长者说话脱吉庆场合应该当作“忌语”，因为“死”毕竟勿是啥个“好字眼”——虽然上海人常说“我今朝开心死【sa】了！”“侬哪能有点死【xi】样怪气？”……上海闲话中迭个“死”字从“音”到“义”实在是“活”得很！要“听得懂”才能“用得好”，绝对勿好“瞎来来”。