凡是居住条件有了改善个上海人家里向，烧饭烧菜个房间改称为厨房间了。老底仔上海人是称之为灶头间、灶披间个。上海个老城厢、老地段、老弄堂、老房子，灶头间、灶披间还有，还坚持活着。不过灶头间、灶披间里个交交关关物事已经改朝换代了，有个已经退出上海人个生活了。煤炉可以讲是最早撤退个。老早个辰光是煤球炉，后来有了煤饼炉。灶头间里总归有煤球、煤饼常驻个，还有生煤炉个柴爿、废纸、纸板，还有盛煤球、煤饼灰个家生。煤气、燃气登堂入室后，煤炉晏歇会了。马路浪个煤球店、柴爿店也随之消失了。现在啥人家还拎得出一只煤球炉、煤饼炉，可以讲是吃价了。可以送到老上海博物馆去亮亮相当展览品哉。

　　灶头上个铜吊也难以寻觅了。上海闲话里拿烧开水个水壶叫做吊子。铜质个叫铜吊。铝质个叫钢宗吊子。钢宗个水壶还能够从大超市个货架上寻得到。绝大多数个上海人家早就用电个烧水壶了。热水瓶也慢慢退出了，电个暖水桶登上了灶台。相继退伍个还有搪瓷面盆、搪瓷杯，盛米个米缸，装酒个老酒甏，装糖装盐个钵头。上海人形容小菜烧得太咸了，会讲一句：“好哉，侬是盐钵头打翻了！”估计再过一代两代，小上海人会听勿懂盐钵头了。为了保暖烧好个饭菜，灶头间里过去是少勿脱焐窠个。稻草稻柴做个焐窠也叫草窠、饭窠。现在伊拉也人间蒸发了。老上海个大人家也会装备一只两只紫铜暖锅。辣“横扫一切”个年头里，暖锅算是“四旧”，被砸烂了。现在有各种档次个电热锅替代了。大小暖锅到云南路、广西路还可以见到一排排林立街沿上，是伊面个涮羊肉店铺招徕客人个道具了。

　　明显退出历史个是上海人个菜篮头。篮头、篮头，老个上海人天天要拎了去兜小菜场个。篮头个花头透了，有四角篮、六角篮、元宝篮、面筋篮、本地篮头、杭州篮头。当下个上海去买菜常常是空手而去个。菜摊头提供大小塑料袋袋。老伯伯、老太太是拖一部两轮小车子，方便省力。灶头间是汏米、淘米个篮头，上海闲话叫淘箩。淘箩用过，摆到日头下面晒一晒、晾一晾。勿知勿觉，竹头做个、篾竹做个、籐条做个大大小小家生都被塑料制品取代了，而且淘汰了干干净净，只要侬到自家个厨房间里去扫描一通，就晓得了。生活，用上海闲话来讲是日脚，日脚真是进步了。