交关人勿欢喜黄梅天，嫌比伊湿嗒嗒，黏滋滋，又因为气压低，人邪气郈斯。所以有人想要像候鸟一样过日脚：天热朝北走，天冷去南方；此地落雨，阿拉就逃去阳光明媚个地方。不过，现实中呒没几个人可以真正做到来去自由，无牵无挂。搿末，就随遇而安好口来。

　　宋代诗人赵师秀《约客》里写：黄梅时节家家雨，青草池塘处处蛙。有约不来过夜半，闲敲棋子落灯花。

　　对呀，家家人家屋头顶浪侪辣落雨，老天爷也勿会独独欺负某一家。虽然人人侪淋辣雨里向了，不过，池塘水满，青蛙倒是开心了，叫声就特别闹猛。侬觉着无聊，可以约个朋友一道听听蛙声，赏赏雨景。朋友搭架子勿来，就自家搭自家着着棋咯，呒没啥勿可以。

　　对于怕因为落雨淋湿头发、裤子溅到泥浆个人来讲，正好有理由勿出门，难得清静。

　　要么，侬还可以乘地铁到朱家角去走走，17号线下来，码头浪个小船直接送侬到古镇，小船、石桥，假使呒没小雨飘飘，反而少脱一眼味道。

　　侬不妨试试看，走吃力了，寻一只屋檐头，立一歇，手一伸，撩得着雨，窨笃笃，邪气适意；再转身走进一家小饭店，叫一碟嫩菱炒毛豆，一盆干煎川条鱼，一锅子扁尖冬瓜汤，一碗青浦蛙稻米白饭，迭个辰光侬就会觉着，就算是黄梅天，也一样是好日脚。