老底子个弄堂里，一定要有小囡来弄出点事体，跟埃些老闹猛个场面再搭界。比如斗鸡、抽“贱骨头”，踢球踢碎玻璃窗……

　　迭副腔调个搞七廿三，来配合弄堂里剥落个墙面，配合伊一日到夜少有阳光个角落，配合伊用石头、石条铺就个路面；垃拉搿些路面浪，经常排列了交关物事要晒太阳，-歇歇有人家买了煤灰自己做煤球、煤饼，乃末弄堂里向排成黑赤赤个一片；里弄加工场做个口琴盒子，叠起来，赛过搭积木；碎布头用浆糊贴拉木板浪放垃拉太阳底下头晒辣海个“硬衬”，一块块靠垃拉墙角落里；晒“雪里蕻”做咸菜，晒西瓜皮西瓜子，晒马桶，晒棉花胎。几只煤球炉子辣海生火，有个矮墩墩，有个生个长脚，各家侪是用惯了个，拎出来，先估估感受风向，拿炉门对垃拉风来个方向，吹风，等到消了烟，是煽着了；垃拉呒没风个日脚里，迭家个小囡，就用一把老老破旧个蒲扇，噼咧啪啦个煽。我是做过搿种事体个，勿光对垃炉门煽，还要垃拉上头拍炉口，乃末上下通风，火头就会得呼呼个着起来。

　　垃拉生炉子个当口，我开始接触了报纸。是用旧报纸引火，点燃柴爿，再掼进烟煤，再由烟煤燃着煤球。垃拉点燃报纸个一刻，我会下意识个摊开报纸，留意一下上头个字，看看高头还有啥有劲个事儿，简单个跟伊作个告别。垃拉“文革”个辰光，我就特别留意，因为搿个辰光报纸浪会有交关“毛主席像章”，假使引火烧着了，拨人家看见了，勿得了，是会变反革命个。后来我索性第一版报纸侪留下来，因为毛主席照片侪是登垃拉第一版浪个；还有，就是套红个报纸，侪勿好生炉子个。后首来有人发明了封炉子，就是垃拉过夜个辰光，用煤灰糊拿炉口封起来，留一眼眼小孔，第二日再拿伊掘开，省得天天生炉子了。其实迭个封炉子个生活老勿好掌握，勿是半夜里灭脱就是烧过了，搿个侪得看留洞洞眼个大小跟炉门留下缝隙个控制。不过一家人家，总归会得出一个封炉子高手。第二天早浪爬起来，如果炉子浪吊子里水哒哒滚，打开炉子还有火头，葛末是成功个。后首来煤球炉子改进了，用煤饼，北方人叫“蜂窝煤”，买煤、加煤方便了交关。一只煤饼浪有十二个洞，加煤饼个辰光一定要对准洞眼。假使煤饼洞眼塞牢了，豪燥拿一根铁条来通洞洞眼。

　　家家人家个煤饼炉几乎是一直点辣海个。煤饼炉浪炖得顶多个是一只铜吊【水壶】。上海人向来会精打细算，伊拉勿会得拿开水揩面孔汏脚。事实浪，垃拉煤饼炉子浪拿水烧得半开，一天里最后一只煤饼烧光个辰光，揩揩弄弄侪结束，热水瓶灌满。如果多了大半壶开水，也会主动跑到隔壁人家去冲进别人家个热水瓶里。经常有张家阿婆拨拉李家阿婆个热水瓶灌满了个事体发生。