我特地问囡儿，“啥叫煤球炉？”伊摇头讲勿晓得。也难怪，现在个小囡看勿到煤球炉了。不过我是跟煤球炉打了30年交道。

　　小辰光阿拉棚户区里每家人家烧饭个能源就是煤球炉子。“开门见山”是句成语，而阿拉改为“开门见烟”，因为早浪起来推开门，就看到家家垃拉生煤炉，迭个烟熏得来呛人。乃末只好关门窗，过一歇再开门。有辰光是搿家刚刚生好了，埃面人家又生了，早生个必定是屋里有上班搭仔上学个，要赶着做早饭；晚生的，基本浪是眼退休个老年人。

　　上世纪六十年代中期，我9岁辰光姆妈呒没了，作为“独苗”个我就开始生煤炉了。记得第一趟生煤炉足足生了两个钟头煤炉还呒没旺【yhang】，急得我哭了，最后还是邻居帮了我才成功。生煤炉看看便当，实际浪并呒没介容易。先要用纸头或者稻草引燃柴爿，等柴爿烧了一歇后再摆进煤球。要使火旺，还得拿蒲扇扇，对着炉门“呼哧呼哧”左右手相互交换扇风，大约七八分钟就生好了。经常看到事体做差不多辰光突然想起外头个煤炉，一看，勿是已空烧脱了一半煤球，就是炉子呒没旺，隐脱【熄火】了。搿个是柴爿舍勿得摆个缘故。之后我想出一个办法，拿煤球掰开生炉子，既快又勿用忒多个柴爿。当然，舍勿得放柴爿是因为搿辰光柴爿是计划供应，每户每月4斤，所以我常常礼拜天搭邻居小人去郊外拾柴爿……

　　烧煤炉既占用地方，因为除了堆放煤球外还有其他辅助物像引火个废纸、稻草、木刨花、柴爿等。平常要积攒，旧作业簿、废报纸、花生壳（甚至毛豆、蚕豆壳晒干）侪要备牢。还有两桩事体是棚户区个一道风景，一是劈柴爿，二是拿呒没烧光个黑煤屑拣出来用水调和再做成煤球晒干再用。

　　九十年代初，随着粮票、布票、油票、肉票咾啥取消，煤炉也慢慢进了“历史博物馆”，政府为阿拉提供了液化石油气。看仔簇崭新个钢瓶，阿拉爸爸开心得合勿拢嘴巴，因为伊半个世纪要“烧煤气灶”个梦想终于成为了现实！从煤球炉到天然气，我伲老百姓的日脚就像搿个灶浪向个燃气红红火火！