我一向对上海个滑稽戏，可以讲是邪气欢喜。小辰光就晓得姚慕双、周柏春两个大名鼎鼎个滑稽大师。搿歇辰光电台里向每日夜到6点半，就有得一档节目叫“说说唱唱”，搿个节目听得邪气有劲。葛咾我勿管碰着啥事体，搿档节目总归雷打勿动要听个。当然除脱姚慕双周柏春，还有双字辈的演员像童双春、王双庆、翁双杰、吴双艺咾啥侪老噱头个，伊拉排出来个像《满意勿满意》《满园春色》咾啥个戏，看得老开心个。

　　乃末“文化大革命”开始后，滑稽戏也一道当做四旧垃圾扫脱了。辣辣搿种讲闲话也要邪气小心严肃个环境里向，大家好像勿大敢笑了。搿个辰光一大批老演员侪打倒了，舞台浪向呒没戏唱了，看来看去8只样板戏。“文化大革命”结束后，滑稽也开始重新回到阿拉生活当中来了。记得有一段辰光黄永胜个上海说唱《古彩戏法》蛮受欢迎，“毯子身浪盖一盖”个唱腔邪气流行。杨华生扮个警察“369”搭仔王汝刚扮演的“媒婆”活龙活现。还有袁一灵个金陵塔，龚伯康个浦东说书，陈卫伯个单口独脚戏侪老受欢迎个。讲到陈卫伯，我觉着其实伊个单口独脚戏形式，好像就是后首来周立波“海派清口”个“原始股”。滑稽是顶具有上海闲话表演特点，假使侬用其他闲话来讲，有交关意思就呒没办法表达清爽。譬如讲，有一句闲话是让勿懂日文个朋友误以为是日本闲话的，伊是迭能介讲的“鞋子唔没坏，鞋带先坏脱”，搿句闲话只有用上海闲话讲，听上去侪会得像日本闲话个。

　　曾经有段辰光滑稽有眼勿滑稽了，笑料勿够。老老勉强个笑声，赛过像硬劲辣辣花观众个“痒兮兮”。滑稽节目勿滑稽，搿倒是蛮“滑稽”个！现在有一批小滑稽像潘前卫、陈靓、舒悦咾啥出现了，伊拉表演个节目也蛮有看头。葛咾作为欢喜滑稽戏个老观众，也希望能够看到更多个有质量个滑稽戏节目，为阿拉送来更多个笑声。

　　上海滑稽戏已经拨拉列为国家非物质文化遗产。搿个勿仅是对上海地方戏曲个保护，也是对上海闲话个保护，而辣辣对上海闲话个保护搭仔发展方面，新民晚报《上海闲话》专栏起到邪气重要个作用，葛咾作为新民晚报搭仔“上海闲话”版面个老读者，我辣辣搿搭讲句实惠闲话：“上海闲话”办得赞，上海滑稽豪燥来！