1950年我考进了长乐路浪向个私立圣心小学。搿个是一只英国人勒垃上海办个教会学堂。搿个辰光我只有五岁，幼稚园只读了一年小班，会写描红簿了，姆妈就带我去考弄堂对过个圣心小学，考官先生问了我爸爸姆妈个名字，还叫我数数字，我从1数到8，老师就讲好了，考取了。

　　圣心小学到1953年就拨国家接管了，一个学期学费六块洋钿，但是变成公立学堂就只收工人子弟了，改名叫向光小学。再后来又改成长乐路第一小学。阿拉个校长是张霭墨先生（现在网浪向可以查到伊个身份），戴了一副金丝边眼镜，穿了一身黑制服，倒是绕过小脚个，当时伊垃拉上海还是个蛮出名个校长。1954年妹妹只好考了只辣辣巨鹿路浪个私立同义小学，学费蛮贵【ju】个，好像记得一个学期要三十几块。

　　圣心小学就辣辣长乐路浪向，有两层楼，每个年级招甲、乙两个班级。平常勒操场里会看到几个着了拖地黑长裙、手里向拿仔一把扫帚，勿晓得勒垃扫啥物事个嬷嬷。搿个辰光先生教书侪是讲个上海闲话。靠向明中学个地方有两只操场，分男操场、女操场。小朋友下课白相是要男、女生分开的。学堂里个先生侪是文绉绉个女先生，改成公立以后再调来了几个男先生。

　　搿个辰光“要和平勿要战争”个口号叫得交关响，有一趟学堂里让同学们排好长队去游行，先生带阿拉从校门口出发，沿牢仔马路、围牢仔学堂到淮海路兜一圈，搿日子阿拉侪穿得老漂亮，带队个花车浪向个女生，伊比阿拉高一年级，是校方从全校学生子当中拣出来个：伊墨墨黑个头发浪戴了一只白色康乃馨花头箍，浓浓个眉毛、大大个眼睛、嫩嫩个面孔浪有一对迷人个酒靥【yik】，小小嘴唇皮血血红，真好看！校工推牢伊坐个车子走，阿拉就勒后面跟牢仔伊坐个车子走。阿拉呒没着统一个衣裳，但每个人发一根裹了金银纸个棒头，侪要拿伊举过头顶心，棒头浪向还贴勒海星星、月亮搭之和平鸽。一直到现在我还常常回味起搿个辰光个场景。过节，学堂里叫每个班级侪要开文艺晚会出娱兴节目，我长得小，勿晓得倒也拨拉先生拣中了，真个十分焐心，跳舞个人一律要穿白皮鞋。姆妈想想小人也是为了得班级争光就陪我到淮海路儿童商店去买了双最最漂亮个白皮鞋。阿拉姆妈、阿姨侪到学堂里来看我跳舞，侪讲我跳得蛮好个。到现在我还是蛮欢喜跳舞蹈。一跳舞就会想起搿日天穿个白皮鞋。

　　抗美援朝辰光，学堂里就叫阿拉大家捐钞票，阿拉侪回去问姆妈讨钞票来捐，后来我看到红榜浪向有我个名字，心里个味道真好。不过先生讲个，多多少少侪好个！只要有颗爱国个心，阿拉一直到老侪有一颗圣洁个心。