上个世纪80年代初，像我迭种辣辣年轻辰光因为众所周知原因呒没好好读书个人，等到成年有了老婆小囡了，反而要到学堂里去学文化、补文凭。毕竟是上了年纪了，要读书，乃末基础差，所以对语文课上关于动宾、主谓等词语结构个理解一时难以如愿。幸好厂校个陈老师有办法，伊用当时上海人当中已经邪气普及个上海话“分挺搭挺分”来解释主谓、动宾等词组结构，三十年后个今朝我还牢牢记辣心浪。

　　分“挺”——“分”代表钞票，是名词，作主语用；“挺”代表多，是形容词，作谓语，拼辣一道个词组就是“主谓结构”。当时上海人常庄讲：搿个人“分挺”！意思就是：搿个人钞票老多个！

　　“挺”分——搿搭“挺”代表出、甩，是动词；“分”代表钞票，也是名词，作宾语用，合起来个词组就是“动宾结构”。

　　比如当时朋友阿三搭小扣子插队落户回来顶替爷娘，辣马路浪碰着后，阿三说：哪能？到隔壁老饭店里涮一顿？小扣子讲：我来挺分！阿三又讲：算侬分挺啊？劈硬柴！搿搭意思翻译成普通话就是：阿三讲：怎么样？去隔壁的老饭店里吃饭吧！小扣子说：我出钞票请客！阿三又讲：算你钱多啊？AA制吧！