上海滩浪陈巨来刻图章是个顶级高手，伊刻图章个名气辣全中国是响当当个，民国辰光，张学良、张大千、吴湖帆也请伊刻过图章，搿类名人个名字，其实还可以拖上一大串。

　　上世纪七十年代末八月个一天下半日，天气邪气热，刚刚落过阵头雨，地浪向湿溚溚，我个老师陆康带了我到陈巨来先生屋里向白相。踏进富民路33号老洋房前，陆康特地关照我，侬看见仔陈老先生，要毕恭毕敬听伊讲闲话，勿要多插嘴，伊是老上海混过来个人，肚皮里晓得个好白相事体多是多得勿得了，听得侬笑痛肚皮。我带侬认得，侬以后有空可以多来请教请教陈老先生刻图章个窍门。

　　走进陈巨来先生个房门，我看见房间里靠近墙壁有两只小沙发，当中放了一只茶几，左边沙发浪坐辣辣个就是大名鼎鼎个大师人物陈巨老，右边一个是陈师母，还有一个男小囡立辣方台子旁边，闷声勿响，长得老清秀个，伊就是现在上海刻图章个名家孙君辉兄。

　　巨老一看阿拉两个人走进来，连忙立起来说：“小康，今朝侬来啦，侬老公公身体好伐？我倒蛮想伊，帮我带一包龙井新茶叶拨伊，杭州来个朋友前几日送拨我个，我一直舍不得喫。侬带来迭个啥人？”陆康介绍，我个徒弟，叫杨忠明，伊会刻印钮。我看见眼门前个大人物，长得清秀，头势梳了蛮清爽，眼睛邪气有神，心里吓势势，抖豁豁，一句闲话不敢讲，连忙对着巨老、巨老太太鞠躬。巨老手一挥讲：“坐，坐，吃点茶，等脱一歇歇，侬拿印钮出来让我看看，到底刻得好勿好。” 

　　巨老对陆康说，我搿几日图章生活忙得勿得了，眼睛刻得看物事也看勿清爽，几个宾馆里送来个印我侪弄好了，吃力煞，赚不到几块洋钿钞票，连去书场听书也呒没辰光，陆耀良几次托人来讲，要我脱侬一道去听听伊说大书，说是保证说得噱头足，关子卖得多，哈哈，陆耀良搿个讨厌坯，人是蛮好，还要请我去德兴馆老饭店吃虾籽大乌参，糟钵头，草头圈子。小康，侬看，伊拿来一块老蹩脚个石头，嘿嘿！是我吵了要帮伊刻印的……我辣旁边听仔笑了，巨老风趣、扎劲，讲闲话不喜欢平平叫讲，大家侪欢喜告伊茄山河，听伊讲讲老早头个事体。

　　我拿出一只蛇印钮拨巨老看，老先生拿出进口打火机，叮个一声，点上一支万宝路香烟，吸了一口，伊低头眯着眼横看竖看，最后讲：“迭块昌化冻石钮刻得蛮好，蛇头是扁个，不是圆个，要注意哦？杨忠明，下趟我拿几只印钮借拨侬做样子，伊拉侪交关古朴，侬帮我刻点怪兽、螭虎咾啥。”我点头连声说：“好，好个！”

　　记得，搿日仔，巨老还说：“小青年要用功，多学点本事，多看点旧书，跟牢我两个刻图章学生，小康，徐云叔，多学点传统艺术，不会错个。现在有些小青年穿仔黑包裤，辣弄堂里抖发抖发，瞎七搭八乱混乱白相，将来有得苦头喫了！”

　　几十年前印坛大师陈巨来先生讲个迭点闲话，是我后来刻苦学习个动力和能量，难以忘怀！