报纸浪讲，近来个好几部国产电影都很卖座，票房个价值已经超过了好几个亿。这点铜钿银子放到欧洲、美洲去是要压塌一片电影院个。不过任何阿拉中国被十三亿人头来一平均，这就吓勿煞啥人了。现在还有多少朋友三日两头去跑电影院个？不必到网上去做民意调查，只要侬有空问问侬周围个亲戚朋友就会有答案了。

　　老老早早——卅年前后吧，大家业余生活里白相个大头之一应该算是到电影院去看电影了。伊个辰光，上海滩浪个电影院真勿算少。南京路浪有大光明、新华。淮海路浪有国泰、淮海、嵩山和八仙桥个大众剧场。交关剧场是有戏个日脚里卖戏票，呒没戏个空档里就放电影。延安路浪有沪光和上海音乐厅。衡山路浪是衡山电影院，东湖路浪是立体电影院。辣当时戴了眼镜看立体电影算老时髦个，只是一年到头永远只放一部片子《魔术师的奇遇》。复兴路东头个叫长城电影院，西头个叫上海电影院。就是现在个新天地这一片天地里，还迓着一只戏馆叫大庆剧场，是专门放放末轮老片子个推扳影院。

　　当时个电影院上午有早早场、早场，下午有第一、第二场，夜里向有第三、第四场。平常有学生场，礼拜天有儿童场。早早场、早场、学生场、儿童场票价都打折头个。有点身价个老克勒们与轧朋友轧得热络个小青年侪只看第四场个电影。看好电影，荡荡马路，数数电线木杆，我送侬、侬送我，也是一段电影故事。上海人看电影个高潮是辣国门初开之后，一批一批外国电影冲进来了。上海电影译制片厂里个配音演员们忙煞，随后红煞。后头还行出了内部电影，宁波路浪个新光电影院就此一炮走红。

　　老上海人去看电影，票子是在八天之前就去买好了。临时想到看一部新片子，只好到电影院门口去等退票。由此黄牛党就发展壮大了。路灯初上，离电影院十间门面之外就吆喝声满街：“票子有票子有”“当场票要当场票要”黄牛加价几只角子算是温柔个一刀，等到退票个常常还连呼万幸，兴冲冲个看电影了。

　　等退票后来也成了上海闲话里个一句俗语。等退票形容个是侬所中意个女士或男士已经有了恋爱对象，侬只好一侧静观其变。对方一旦分手一拍两散，侬就马上献上爱意。退票等到哉。等退票意义个延伸后来又用到方方面面。反正耐心等候，见机行事是伊个初意。

　　如今看电影早不是万难个事体了。可以足不出门孵辣屋里向看电视、看碟片。上上网是跑到啥地方侪可以笃笃定定看一大堆电影。从看电影个变迁也可以感觉到社会前进个脚步声，对？