我辣辣上海度过从幼稚园一直到大学个全部学生时代，是程乃珊个同龄人，现在大家侪退休了，几位热心个同学隔几年就要组织同学会，留辣上海个勿必讲了，像我搿能个“沪籍外地人”也会得三三两两从全国各地甚至美、英咾啥个地方回来轧闹猛，一来看看老同学告老师，二来吃吃大饼油条馄饨小笼包，乐此勿疲。同学聚会当然侪讲上海话为主。慢慢个，我发现大家个老派上海话一眼眼辣变了。“上当”变成“吃药”；“对勿起”变成“帮侬打个招呼”；“呒没关系”变成“勿搭界个”；聚餐费则是从“平分”到“AA制”到“劈硬柴”个三级跳……不过阿拉搿批九斤老太毕竟勿够也勿欢喜忒新派，我就呒没听见同学会浪有啥人拿“我”讲成“沪”个，也老少听到讲“某某模子”之类个。 

　　由此我想到了自家钟爱个程乃珊个作品，伊能够拿各阶层个上海话天衣无缝个组织到普通话个写作里向去，既充满雅俗共赏个上海风情又让各地人完全看得懂，搭近年来流行个上海话是两个路子。我决勿厚此薄彼，本来就各具风格末，但从几次同学会看来，我们搿批老人更欢喜个是前者。