外孙囡今年8岁，老缠着我讲故事，伊现在勿爱听我编个大灰狼做好事、参军搿些瞎七八搭个故事，要听用上海话讲历史故事。我试试看，讲一只《三国》故事——

　　三国辰光，周瑜和曹操打仗，拉诸葛亮来出点子。周瑜问：“我跟曹军水上打仗，用啥兵器最好？”诸葛亮想也勿想回答：“用箭最好。”周瑜说：“对，侬搭我想到一道去了。现在缺箭，请侬帮帮忙，拨我弄十万支来。”

　　周瑜迭个人，年纪轻轻，门槛老精，本事蛮大，气量太小。伊要请诸葛亮帮忙，还要暗地里弄送诸葛亮。伊对诸葛亮讲：“侬十天功夫拿出来。”诸葛亮轧出苗头说：“侬打仗需要，十日功夫太长了。”周瑜问：“葛末几天造好。”诸葛亮伸出三只指头：“三天够了。”周瑜有点勿相信：“侬勿好打棚个噢？”诸葛亮说：“我哪能敢告总司令打棚。我愿意立下军令状，假定三天造勿出，情愿拨侬打屁股。”周瑜很高兴，请伊喝老酒。诸葛亮老早计算好了，对周瑜讲：“从明天起，到第三天，侬派五百个兵到江边来搬箭。”伊喝了几杯老酒，摇摇鹅毛扇走了。

　　搿10万支箭从阿里弄得到？是诸葛亮问曹操借来个。

　　鲁肃是个老实头，对周瑜说：“十万支箭，三日功夫，哪能弄得出？诸葛亮迭个小伙子，嘴上呒没毛，办事靠勿住，摆噱头骗骗侬。”周瑜讲：“是伊自家说个，我又呒没逼伊。关照军匠，造箭用个材料，覅拨伊准备齐全。到辰光伊拿无出货色，我要寻伊算账。”

　　曹操是周瑜个冤家对头，哪肯借箭拨伊。诸葛亮自有妙计囥垃肚皮里。

　　诸葛亮向鲁肃要了20条船，每条船上有30名兵。船用青布遮好，还要一千多个草把子，排垃船个两厢。鲁肃问派啥用场，诸葛亮卖关子勿讲，关照要船事体覅告诉周瑜。

　　20只船一列排开，摆垃江上，头一日，呒没动静，第二日，又呒没动静，直到第三日四更天，诸葛亮暗促促把鲁肃叫到船里。鲁肃问伊：“叫我来做啥？”诸葛亮说：“请侬来搬箭。”

　　迭个辰光天墨墨黑，江上大雾漫天，面对面看勿清人个面孔。船慢吞吞靠近曹军水寨。诸葛亮下命令把船尾朝东，一字摆开，又叫船上个兵一边擂鼓，一边大喊大叫。鲁肃吓煞了：“如果曹兵冲过来，呒没退路，大家侪完结。”诸葛亮笑笑说：“雾介大，伊拉不敢派兵出来。我搭侬只管吃老酒，天亮回去。”鲁肃半信半疑。曹操迭个戆大听见鼓声，大叫一声：“江上雾大，敌人要打过来哉，赶快放箭。”伊本来手下有四千射手，再增派六千，一万名射手一齐朝江中放箭，嗖嗖嗖嗖，箭像落雨一样，一齐落到20条船个草把子上。过脱一歇，诸葛亮再拿船掉个方向，船尾朝西，仍旧擂鼓大叫，曹军戆噱噱又嗖嗖射箭过来，诸葛亮笃悠悠垃船里告鲁肃吃老酒。

　　天亮了，20只船个草把子上插满了箭。周瑜派人拔下来，数一数，10万支箭，只多勿少。