从河南中路走进方浜中路，过上海老街个牌楼百二十步是一条名叫侯家路个南北向小街。就辣南首个转弯角子浪有一爿清真面店，老城厢居民都叫伊为老头面馆。老头面馆个老板是一个老头，老上海人。我认得伊个辰光就将近80岁了。老头中等个头，面色红润、腰背笔挺，两条寿眉已经开始花白了。老头个嗓门响、中气足，只是声音有点嘶哑了。进门来吃面个老顾客都会与老头打打招呼、问长问短。大家都喊老板“老头、老头”，老头姓啥名啥也勿见有啥人去打听攀谈。

　　老头面馆其实勿大。底楼呒没店堂。进门就是一只小方桌，是老头卖筹码个收银台。一侧便是下面个厨房了，两口大锅烧得热气腾腾。上二楼是一条小扶梯，狭得只可以容一人上下。扶梯转弯个地方外面又搭出一间热炒个小厨房，专门来烧现烧个浇头。二楼个店堂摆了七、八只长桌，就是顾客坐得塌塌潽潽，也最多只好塞进四五十个人。老头面馆中浪向生意最好，连老房子个楼板也拨大家踏得格格响。老头面馆个看家面点是咖哩牛肉汤面和红烧羊肉面。羊汤面与羊杂面味道也勿错。老头最得意个是伊拉烧个牛肉汤。老头讲：“阿拉当天笃出来个牛肉汤当天卖光。呒没隔夜陈汤。汤勿够了坚决勿会再加点水、加点味精来蒙骗老客人。今朝卖光了，明朝请早！”老头面馆还有一个派头大个手段，那就是香草末子、大蒜末子放开供应，挺吃勿动气。哪怕搿点汤面香头辣小菜场浪价钿再贵，老头也一点勿肉麻，只要大家吃得适意。

　　老头过了80岁就退居二线，让女儿和外甥收银，自家到二楼店堂里招呼客人。要上面点、要收拾台子，老头就指挥几个跑堂个老妈子：“小李，牛肉汤面送3号台！小张，靠窗个台子快点去揩一把！”我问老头：“人家也五六十多了。侬还喊伊拉小李、小张？”老头开心了，嗓门又响起来了：“我已经过了八十，伊拉还不足六十，我当然要差差伊拉。年纪小了，就是小李、小张！”老头还做善事，每年老人节要往街道里送去寿面。一面表扬伊敬老个锦旗就光荣个挂辣店堂中央。世博会个辰光，老头还特意去做了一身大红缎子个中装穿上。伊笑道：“阿拉上海人做主人了，要打扮得摩登点拨外国人看看！哈哈！”

　　我有年把呒没去老街了。上个礼拜去老头面馆，店招换了新个：“张续昌老头面馆”。上面还有一张老头笑眯眯个照片。伊个小外甥告诉我，伊个外公老头去年过世了。老头86岁走脱了。伊一生个近一半辰光是辣面馆里过脱个。老头勿在了，但老头面馆仍旧热气腾腾，牛羊肉个香味仍旧飘荡辣老街浪。怀念老头……