清朝初期，上海已经成为全国南北贸易个枢纽，据地方志记载：“凡远货贸迁，皆由吴淞口进泊黄浦；城东门外，舳舻相衔，帆樯比栉。”因为各到各处客商侪到迭搭【这里】从事经营活动，出于“敦和乡谊，联络同行”个需要，交关以同乡同业为基础个组织陆续出现。垃搿里向，顶早建立个是商船会馆。

　　上海老早就有“沙船之乡”个名声。沙船“以出崇明沙而得名”，也叫做防沙平底船，是一种优秀个木帆船船型，适宜垃水浅滩多个海区航行。随着沙船业个迅速发展，本埠搭外地个船主经过商量，侪觉着应该垃上海筹建商船会馆，乃末大家一道集资出力，到仔康熙五十四年（1715年）搿个建筑基本完工。商船会馆造垃上海县城东门外马家厂(今会馆街)，里向有楼、台、殿、阁，飞檐高翘，古色古香。商船会馆作为上海头一个同乡同业团体，日常个事体“悉归号商管理”，并“立董事以总之”，负责调解同业纠纷、平均同业利润咾啥。

　　垃拉乾隆、嘉庆年间，黄浦两岸停靠个各种商船数都数勿清爽，当然搿里向沙船占了一大半。埃个辰光，勿少资本雄厚个老板侪有沙船几十艘，雇用船工上千人；据说一艘载重八十吨个沙船，每年个投入大概需要三千两白银，而所得利润大概是七千两白银，所以船主们可算是上海最富裕个阶层。因为船主们一再要求搭热心赞助，商船会馆进行过大规模扩建搭重新翻造，占地面积达到二十亩，正门像一座城门，门前放着两只龇牙咧嘴个大石狮，门额浪雕拉海立体个“商船会馆”字样。商船会馆曾经“极缔造之巨观”，成为上海顶大个会馆建筑：将近两百平方米个双合式大殿，设神龛供奉天后；殿前是两层戏台，上头有八角形漆画藻井，搿垃上海两百四十多个会馆（公所）当中是独一无二个；殿后是议事大厅，殿右有两层会务楼；里向还有拜厅搭钟鼓楼，真是美轮美奂，气势宏伟。另外，碰着航海佑护神天后诞辰(农历三月二十三日)，船主们侪会一道聚垃大殿里向，举行隆重个祭祀仪式。

　　鸦片战争后，外国资本主义侵略势力依据不平等条约拿上海强辟为通商口岸。外国轮船勿断涌进来，沙船业开始勿景气。所以，恭亲王奕訢垃同治八年（1869年）向朝廷奏称：“上海沙船从前极旺，一经洋商装豆石，遂使数千只沙船尽行歇业，数百万家资的船户变为贫民，其舵工水手更无生计。”尽管迭能，商船会馆仍旧正常运转。垃太平军进攻上海个辰光，商船会馆拨“洋枪队”占为防地；后来，商船会馆又归江南制造局使用。过了好几年，商船会馆总算回归沙船业，垃伊边浪还设“承善堂”处理跟船工伤亡搭界个事体。光绪年间，商船会馆得到整修，天后神像加戴重四十八两个点翠金冠；另外，办起了商船小学（后来更名商船补习学校）。由于沙船业逐渐衰落，最终商船会馆个建筑全部派了别个用场。民国期间，商船会馆被改组成沙船号业同业公会。

　　商船会馆是上海民间航运兴衰个宿影，也是上海以港兴市个历史见证。搿抢里去看，伊个旧址已经变成一幢危楼，部分结构残缺勿全，亟待修缮保护。