小辰光夜饭吃好，面揩好，姆妈会拿出来一瓶雪花膏，叫我过去搨“香香”。我用一只手指末头撬一小沰【dok】，左面一沰，右面一沰，搨垃面孔上头，再拿小手掌勒垃面孔高头撸开来。姆妈讲，小人皮肤嫩，冬天介，假使揩好面勿搨雪花膏，面孔老容易开皴个。就是面孔皮肤绷开，变成俗话讲个萝卜丝面孔，假使有啥事体勿称心，再一哭，眼泪水流垃上头，乃末痛是痛得来要死喔！

　　老早仔市面浪物事花色品种少，记得雪花膏好像只有“友谊牌”一种，外面个纸盒子是黄颜色个，上面有金色个花纹，里向个瓷瓶子是玉白色个，摸上去冰冰瀴【yin，凉】，盖头是绿眼色个。雪花膏个香味道勒垃我记忆当中老深刻个，到现在，几十年过去，只要一讲雪花膏三个字，一股带点俗气个香味就会得勒我鼻头前头升腾起来。搿个辰光，小朋友还呒没专用个面霜，一家老小人人侪搨同一瓶雪花膏，身浪向味道侪一样个。

　　“百雀羚”是一种比雪花膏更加油个护肤品，宝蓝色个铁罐头，盖头高头个商标是黄颜色个，高头还有四只喜鹊，三只橘红色个，一只绿颜色个。铁罐头是扁平个，打开来里向有一张薄薄个锡纸覆盖垃油脂高头。用得小心个人，勿完全  【xiao】开锡纸，而是开一只角，挢【jhiao】一眼眼搨垃面孔浪向，再封起来，当宝贝一样，省省用用。百雀羚个罐头分大中小，买一罐小个放垃袋袋里，揩好面汏好手经常可以用，有眼像现在用护个手霜。

　　我记得百雀羚个香味帮雪花膏比，更加刺激一眼，时髦一眼，大概是因为年轻人用得多个缘故；而雪花膏味道就比较温和，散淡一点个感觉。还有一种更加低端、普通额护肤品就是蛤蜊油了，小辰光阿拉还叫伊“哈利油”。蛤蜊油是装勒垃空蛤蜊壳里向再起迭个名字个，其实里向是凡士林加了一点香料做成个，老厚个膏状，里向个油膏就是蛤蜊壳个形状，高处像山峰一样，手挖上去蛮硬个，搨垃手浪要用点力气抳开来。咬合齿口也有密缝个，比较松，虽然蛤蜊油价钱便宜，但蛤蜊壳是天然个，香味老少，但是护肤个疗效倒是比雪花膏、百雀羚要好。冬天介手脚裂开了，搨其他物事呒没用，只有蛤蜊油搨得好，袜子穿好，手套戴好，睏一夜再会愈合。

　　以上三种护肤品，侪是老上海人老早底介用惯个面霜，现在市面浪勿行【hang】了。但是有辰光出去旅游，勒垃边远地区小镇个柜台里邂逅迭些怀旧个物事，真个会激动得喊起来。