我搿个人蛮财迷个，眼睛一瞄到“有奖”两个字，保准发光，凡是夜报浪向出个有奖答题，我侪老起劲参与个，尽管从来呒没得过奖，有一眼眼殟塞。当我一发现《上海闲话》专版浪要求回答关于“张行”个趣味题个辰光，眉花眼笑，兴奋得豪燥拿起笔来答题，因为搿5道问题对我来讲实在是毛毛雨，阿拉一枪头通过。阿拉更加硬档个是，我还有一张张行刚出道辰光参加吉他演唱会个节目单。有？

　　讲起搿张节目单，是我前两年垃拉文庙旧书摊浪淘来个。现在回想起来，埃天介交关收藏爱好者兜来兜去侪呒没看中伊，倒是跟我有缘，拨我“捡漏”了。节目单（见附照）24开大小，一折三，是1984年9月为了庆祝中华人民共和国建国35周年，共青团上海市委宣传部联合《青年报》社主办个“上海青年吉他演奏弹唱音乐会”专门印制个节目单。音乐会顾问搭指挥侪是谭冰若和奚培坤，是当年上海音乐界个著名人物。张行搿辰光还呒没啥名气了，伊排垃第3个出场，唱了3只歌，分别是：台湾歌曲《中华民族》、台湾校园歌曲《夜火》、台湾歌曲《阳光和小雨》。搿三只歌我好像呒没啥听到过？伊个《迟到》吾倒是背得出个。顶有意思个是，当时赞助演唱会个“飞乐电声总厂”、“第六衬衫厂”，我估计现在也呒没了，勿过我搿张节目单倒是帮伊拉留下来一眼历史痕迹。

　　万万呒没想到，当初还是小青年个张行，现在搞了介大，伊几十年个拼搏真个勿容易啊！上海还是蛮爱惜人才个。搿趟伊回上海只开一场演唱会，我老想拿搿张节目单送拨张行，伊自家估计呒没保留，但愿我垃拉《上海闲话》版面浪能够中奖。