茂名北路浪个丰盛里前些天闹闹猛猛开张了。据讲要搭新天地别苗头。阿拉小学里个小伙伴们一道去尝鲜。赤刮新个清砖墙，老样子个砖雕石条门头，外墙细部有雕花刻图，二层有挑出个阳台。十幢石库门建筑外头弹眼落睛，里向五花六花，侪是外国派头个餐饮，邪气摩登时尚。

　　不过，阿拉侪勒肚皮里向讲，划进大张园个丰盛里已经面目全非，只剩一只壳子了。

　　我勿由想到阿拉小辰光张园个弄堂生活。老底仔呒没“社区”个讲法，石库门弄堂就是一个小社会。里向有一点小店小摊，只是伊拉侪是最最贴近老百姓生活需要个。

　　印象深刻是春阳里口口头个烫衣裳店，呒没招牌，只有一间长条形房子，一半是屋里向人住，一半做柜台，老板辣上面收发衣裳，夜里上几块半截头个排门板，就算打烊了。后弄堂个王家伯伯，是中学老师，伊特别考究，衬衫裤子侪要烫过，我一直看到伊去烫衣裳。“文革”来了，烫衣裳店就关门了，勿晓得王老师后来到啥地方去烫衣裳了。

　　穿到茂名路去个弄堂口有一爿烟纸店，因老板姓刘，阿拉侪叫伊“刘老板烟纸店”。香烟肥皂自来火应有尽有。我差勿多每天要去“报到”。从幼儿园回来，第一桩事体是问祖母讨5分或者一角，跑到老板店买桃板橄榄盐津枣咾啥。“拣只大点噢！”两只眼睛盯牢刘老板辣玻璃瓶里搛来搛去个筷子。“文革”中“刘老板店”也关脱了。

　　当然勿得勿讲个还有弄堂里个废品回收站。搿只废品回收站像只黑颜色个碉堡，用木板钉起来个，里向小得只好立一个人，不过伊倒是样样物事侪收。屋里杀只鸡，拔下来湿溚溚个鸡毛，祖母总归放辣淘米竹篮头里，叫我到废品回收站去卖脱。当然卖下来个铜钿就拨我买桃板吃，告咾我是跑得飞快。

　　弄堂里包罗万象，有小学，有幼儿园，弄堂口有吴江路小菜场，穿过弄堂底到威海路，有酱园，有老虎灶。拎仔热水瓶、铜吊泡热水，是阿拉小八腊子个事体。老虎灶个边浪早浪向会摆出大饼油条摊，拿根筷子串仔几根油条，回到屋里蘸酱油吃，味道邪气好。

　　靠近南京西路还有一家联合诊所。听大人讲，搿家联合诊所是解放前私人医生辣解放后合并起来个，医生水平搭态度相当好，阿拉小辰光看毛病打针侪去搿搭，从来勿跑远。辣海张园个大弄堂里还有一只居民图书馆，伊辣拉一家石库门个客堂间里，黑漆大门一直敞开仔，走过天井，就到借书个地方。邻居林家公公是义务图书管理员，我小学三年级就去伊搿搭借书看。《红岩》《战火中的青春》《平原枪声》侪是从张园图书馆借个。

　　几条大一点个弄堂里侪有一只井。每个礼拜四是弄堂里大扫除个日脚，居民小组长哇哇一叫，家家人家出来一个人，拿仔铅桶搭竹丝扫帚，吊起井水，弄堂打扫得干干净净。

　　现在新开张个丰盛里，名称还是老名称，外观也是石库门个老样子，不过里向个五脏六肺侪调脱了。像丰盛里新天地搿能个石库门改建，符合现在个需要，不过再也呒没我心里向个石库门味道了。