我迭个人比较闷，性格比较内向，老同学阿华劝我平常勿要一天到夜辣辣网上打游戏，应该多进几只网浪向个圈子。我不理解阿华讲个“圈子”是啥意思，阿华告诉我：“圈子是指有相同爱好个人群，现在网浪向各种圈子侪有，比方讲：读书圈、运动圈、理财圈等等，侬朋友圈多了，人也会开心起来。”

　　按照阿华个办法，我建了一个微信群，拿交关老同学侪加了进来，大家交流一下子方便交关，还可以语音聊天，感觉时光回到了过去个青葱岁月，感觉特别温暖。不过，呒没过几天，我忽然发现圈子里有了广告，老早子个班花做起了化妆品代购生意，班长也推销平板电脑，还有一个大学同寝室个兄弟是品牌内衣代理商。一开始，看了朋友个分浪向，我还友情转发一下，至少要点个赞，但是广告越来越多，这只朋友圈一点点变成小商品市场了，我只好选择视而不见。

　　有一天我又发现一个本地“骑行圈”，据介绍成员侪是骑行爱好者，其中还有不少高端人士。我也比较欢喜骑脚踏车，就申请入圈。本以为进了圈可以聊聊骑行技巧，结果来搭闲话个朋友不是推销骑行装备，就是邀请加入骑行俱乐部，据说会费可以八折，还可以邀美女陪骑，按小时计费……对这样个朋友圈，我很快就呒没兴趣了。

　　前两天，QQ上有人申请加好友，一看是几年前辣辣股票交易所认得个老谢，马上点同意。我想跟老谢聊聊大盘、谈谈热门板块和个股，结果老谢领我进了伊个朋友圈。圈子里果然又看到不少老股友，大家相聚本该好好“谈股论金”，呒没想到有人不遗余力卖炒股软件，有人口口声声有内幕消息，可以推荐“每日金股”，当然推荐金股不是免费个。我郁闷了，几次想退群，又碍于面子，只好留辣辣圈子里，不过里向个内容再也不看了。

　　昨天看到一个网友写道：“凡是在我朋友圈里开店卖衣服，卖鞋子，卖包包，卖手表，卖手机，卖平板，卖面膜，卖日用品，还有卖萌个老板们，租金麻烦你们交一下，谢谢合作！我也不容易，忍了一年了！”看了这条消息，我哑然失笑，因为伊讲出了许多像我一样个苦恼和无奈。

　　我于是想，是不是应该鼓起勇气，清理一下门户了，该屏蔽就屏蔽，该拉黑就拉黑，朋友圈里可以互相交往，互相倾诉，互相取悦，但是不应该用来做生意，否则就真应验了那句话“网上无美女，朋友圈里无朋友”。