一书一茶一座，日里聊到夜头；

　　三杯两盏淡酒，肚皮吃饱就够。

　　看到一篇文章，题目是，“房子多少大才够住？”勿晓得有多少人正式想过迭个问题，但眼门前有一只答案是大家普遍认可个：总规是越大越好咯。

　　勿过，据说有美国机构做过调查，过去四十年里向，美国每家人家个房子逐步增大到平均每户250平方米左右。还有一家机构用摄像跟踪了32家人家，结果发觉：搿眼人家几乎呒没人真正使用正式客厅与餐厅，辣辣屋里向个家庭成员一般侪孵辣辣厨房或者过道厅里。因为，大家侪欢喜一道吃饭、看电视。

　　结论来了：

　　一、有人买大房子勿是为了使用。尤其是野野大个餐厅、挑空客厅等正式空间，因为窗门忒大，弄得取暖和空调费用涨得老高。所以，搿种正式空间是为了让人眼热、窝塞个：哦哟，比阿拉屋里大介许多，真正叫人比人气煞人哦……

　　二、有人买房子勿是为了攀比，是为了招待客人。介许多要好朋友，到自家屋里来，阿拉要好好交招待大家。结果，反而忘记了，朋友关心个是人，伊拉是来看人个，勿是来看房子或家具个。

　　现在阿拉人均居住面积也增加仔交交关关。有个朋友，结婚辰光爷娘拨伊一间小房子，九平方。伊个辰光，每次碰着伊，侪要听伊叫苦：从前多少穷哦……后来迭个朋友赚到了钞票，买了别墅，连地下室一共有三层。再碰着伊，伊又常常要叫苦：房子忒大也勿灵个，屋里一塌刮之三个人，常常一个人占一层楼面，一家门三个人碰勿着头……

　　事实上，是有必要想想，究竟房子多少大才适合自家住。